Maqedonia e Veriut, Serbia dhe Shqipëria kanë arritur marrëveshje në Tiranë, për tejkalimin e krizës energjetike dhe efekteve të mundshme nga lufta në Ukrainë, sa i përket mungesave në ushqim.
Zëvendëskryeministri për Çëshje Ekonomike i Maqedonisë së Veriut, Fatmir Bytiqi, në konferencën e përbashkët në kuadër të “Ballkanit të hapur”, me temë “Sfidat kryesore dhe zgjidhjet lehtësuese për rajonin”, sot në Tiranë deklaroi se të tre vendet janë të pajtimit që siguria e ushqimit në kushtet e krizës botërore paraqet sfidë dhe për këtë arsye duhet të krijohen të gjitha mekanizmat e bashkëpunimit.
“Sa i përket krizës energjetike kemi thënë dhe jemi dakordësuar që në kushtet e krizës ekonomike globale për ndërlidhjen rajonale me qëllim të sigurimit të një stabiliteti dhe një sigurie më të madhe në energjetikë. Sepse jo vetëm në qeverinë e Maqedonisë së Veriut është ky fokus, por të njëjtën e ndajmë dhe me partnerët në rajon në Shqipëri dhe Serbi. Dhe kjo do të duhej të ishte një nxitje për të gjitha vendet e Ballkanit Perëndimor dhe të Evropës Lindore që t’i bashkohen shqyrtimit të përbashkët të këtij problemi”, u shpreh Bytyqi.
Zëvendëskryeministri dhe ministri i Bujqësisë, Pyjeve dhe Menaxhimit të Ujërave të Serbisë, Branislav Nedimoviç, vlerësoi sot korridorin e gjelbër për transportin e prodhimeve ushqimore, në kuadër të “Ballkanit të Hapur” që sipas tij ka shtuar qarkullimin me 17% mes tre vendeve.
“Në sektorin e ushqimit kemi linjën e veçantë të Open Ballkan të ashtuquajturin korridorin e gjelbër në vendkalime dhe ushqimi kalon pa kurrfarë problemi nga pika në pikë sikur të bëhet fjalë për ushqimin vendor pa ndalesë, pa probleme që i kemi teknike në Maqedoninë e Veriut, por gjithçka është shumë më mirë seç ka qenë para 7-8 muajsh”, tha Nedimoviç
Energjia, siguria ushqimore dhe mbrojtja civile janë tre drejtimet e para kryesore ku është fokusuar bashkëpunimi mes Shqipërisë, Maqedonisë së Veriut dhe Serbisë, në kuadër të nismës “Ballkani i Hapur”, tha ministri i Shteti për Rindërtim i Shqipërisë, Arben Ahmetaj
Sipas tij, ndërmjet Shqipërisë dhe Serbisë u ra dakord për të bashkëpunuar për shfrytëzimin e rezervave të qymyrit me qëllim furnizimin me lëndë të parë të impianteve termo të Serbisë.
“Maqedonia e Veriut ka shprehur interes për të investuar në terminalin LG në Vlorë. Ndërsa në sektorin e bujqësisë është dakordësuar lehtësimi i barrierave të furnizimit mbi sigurinë ushqimore si dhe funksionimi i tregut të lirë mes tre vendeve. Vendet janë dakordësuar për gjetjen e një mekanizmi në rastet e përkeqësimit të krizës për akses në furnizimin e tregjeve”, tha Ahmetaj.
Iniciativa "Ballkani i Hapur" aktualisht mbulon një zonë ekonomike dhe politike midis Shqipërisë, Maqedonisë së Veriut dhe Serbisë, që synon të nxisë mundësitë e tregtisë, qarkullimit të njerëzve, mallrave, shërbimeve dhe kapitalit për rreth 12 milionë njerëz, si dhe të inkurajojë integrimin e të tre vendeve në BE.
26 Kor 2022
Nismëtarët e "Ballkanit të Hapur" bashkë kundër krizës energjetike
Treshja e Open Ballkan në takimin e sotëm në Tiranë u pajtuan edhe për menaxhimin e krizës me mungesën e ushqimit
TRT Balkan / agjencitë
Lajme të ngjashme
Borxhi i jashtëm: Kosova më së miri, keq në Mal të Zi e Maqedoni të Veriut
Borxhi i jashtëm i Malit të Zi e kalon, ndërsa i Maqedonisë së Veriut i afrohet nivelit kritik prej 60% në raport me Prodhimin Bruto Vendor, pa përfshirë borxhin e brendshëm. Kosova, nga ana tjetër, ka më së paku borxhe në rajon.
Kriptovalutat, korniza ligjore dhe pesha mbi krizën energjetike në Ballkan
Kosova dhe Maqedonia e Veriut paralajmërojnë rregullimin me ligj të veprimtarisë së kriptovalutave, ndërsa ligji prej dy vjetësh në Shqipëri nuk po gjen zbatim maksimal. Ndërkohë gërmimi i kriptovalutave po rëndon krizën energjetike.
Artikujt në këtë kategori
Maqedonci-Anushiq: Kosova ka gjithmonë mbështetjen e Kroacisë për në NATO
Pas pritjes me ceremoni nga FSK-ja, Maqedonci dhe Anushiq kanë zhvilluar një takim të mbyllur, ndërsa më pas të dy ministrat u adresuan në një konferencë për media ku kanë shprehur gatishmërinë për bashkëpunim në fushën e mbrojtjes.
Çfarë tjetër do të donit të dinit?
Popullore