Marrëveshja e drithërave: ShBA-ja ka “besim maksimal” në Türkiyen.     Foto: Reuters 

ShBA-ja ka “besim maksimal” në Türkiyen për ringjalljen e marrëveshjes së drithërave

Departamenti Amerikan i Shtetit thotë se vlerëson përpjekjet e Türkiyes për të rikthyer dërgesat e drithërave të Ukrainës dhe se ka besim të plotë te Türkiye për këtë çështje.

Zëdhënësi i Departamentit të Shtetit, Ned Price, ka deklaruar se ShBA-ja ka “besim maksimal” në Türkiyen për ringjalljen e marrëveshjes së drithërave të Ukrainës.

“Ne kemi besimin më të madh te turqit kur bëhet fjalë për Iniciativën e Drithërave të Detit të Zi”, tha Price në një konferencë për media.

Komentet e tij erdhën në përgjigje të pyetjes se çfarë mendon ShBA-ja rreth përpjekjeve turke për të ringjallur marrëveshjen dhe nëse ShBA-ja ka besim te Türkiye dhe aftësitë e saj për ta bërë këtë.

Price tha se palët në marrëveshja, respektivisht Türkiye, Kombet e Bashkuara (OKB), Ukraina dhe Rusia, deri në fundjavë kanë punuar në mënyrë efektive së bashku gjatë disa muajve për të lehtësuar kalimin e 9.5 milionë tonë drithërave në pjesën tjetër të botës.

“Ne vlerësojmë përpjekjet në rolin që ka luajtur Türkiye kur bëhet fjalë për JCC-në (Qendra e Përbashkët Koordinuese), kur bëhet fjalë për këtë iniciativë më gjerësisht”, tha Price, duke iu referuar organit të formuar në Istanbul me zyrtarë nga Türkiye, Rusia dhe Ukraina për të mbikëqyrur dërgesat e drithërave.

Ai gjithashtu falënderoi sekretarin e përgjithshëm të OKB-së, Antonio Guterres, për rolin që luajti në bashkimin e marrëveshjes dhe ndihmën për të mbikëqyrur iniciativën.

Të shtunën, Rusia njoftoi se ka pezulluar pjesëmarrjen e saj në marrëveshjen për eksportin e drithërave ukrainase pas sulmeve ndaj flotës së saj të Detit të Zi.

Më 22 korrik, Türkiye, OKB-ja, Rusia dhe Ukraina nënshkruan një marrëveshje në Istanbul për të rifilluar eksportet e drithërave nga tri portet ukrainase të Detit të Zi, që u ndërprenë pas fillimit të luftës Rusi-Ukrainë në muajin shkurt.

AA