Të paktën nëntë palestinezë u vranë dhe disa të tjerë u plagosën në një seri sulmesh ajrore izraelite të dielën në Rripin e Gazës, sipas burimeve mjekësore dhe mediave lokale.
Avionët luftarakë izraelitë goditën një shtëpi në qytetin verior Beit Lahia, duke lënë pesë persona të vdekur, tha një burim mjekësor për Anadolu.
Tre persona të tjerë u vranë dhe disa u plagosën kur një avion luftarak izraelit goditi një tjetër shtëpi në Jabalia, në veri të Rripit të Gazës, raportoi agjencia zyrtare e lajmeve Wafa.
Një palestinez tjetër u vra dhe dy të tjerë u plagosën në një sulm me dron në verilindje të Rafah në jug të Gazës, sipas të njëjtit burim.
Pavarësisht një rezolute të Këshillit të Sigurimit të OKB-së që kërkon një armëpushim të menjëhershëm, Izraeli ka vazhduar një ofensivë shkatërruese në Gaza që prej një sulmi vitin e kaluar nga grupi i rezistencës palestineze.
Më shumë se 43.300 persona janë vrarë që nga ajo kohë, kryesisht gra dhe fëmijë, dhe mbi 102.000 të tjerë janë plagosur, sipas autoriteteve lokale shëndetësore.
Izraeli përballet me një çështje për gjenocid në Gjykatën Ndërkombëtare të Drejtësisë për veprimet e tij në Gaza.
