Presidenti libanez Joseph Aoun emëroi gjyqtarin e Gjykatës Ndërkombëtare të Drejtësisë (GjND) Nawaf Salam si kryeministrin e ri të Libanit.
Vendimi erdhi pasi Salam siguroi mbështetjen e 84 ligjvënësve në parlamentin me 128 vende.
Presidenti libanez e ftoi Salamin të formonte qeverinë e re të vendit, tha drejtori i përgjithshëm i Presidencës Antoine Choucair në një konferencë shtypi në Bejrut.
Salam është aktualisht jashtë Libanit dhe do të kthehet të martën, shtoi ai.
Choucair tha se 84 ligjvënës mbështetën Salamin për të formuar qeverinë e re, ndërsa nëntë deputetë votuan për kryeministrin e përkohshëm Najib Mikati për ta formuar kabinetin.
Pasi caktohet kryeministri, fillon procesi i formimit të qeverisë, i cili mund të zgjasë shumë për shkak të peizazhit kompleks politik dhe sektar të Libanit.
Sipas Kushtetutës së Libanit, presidenti duhet të jetë një i krishterë maronit, kryeministri një mysliman sunit dhe kryetari i parlamentit një mysliman shiit.
Emërimi i Salamit për të formuar një qeveri të re vjen pas një vakumi politik dyvjeçar, gjatë të cilit Libani luftoi me ndarjet politike dhe përkeqësimin e kushteve ekonomike.
Javën e kaluar, parlamenti i Libanit zgjodhi Joseph Aoun si president për të pasuar Michel Aoun, i cili la detyrën në tetor 2022, duke u bërë komandanti i pestë i ushtrisë në historinë e Libanit që kalon në presidencë.
