Shtetet e Bashkuara të Amerikës do të vendosin mjete shtesë ushtarake në Lindjen e Mesme nl valën e tensioneve, njoftoi Pentagoni të premten.
“Departamenti i Mbrojtjes vazhdon të ndërmarrë hapa për të zbutur mundësinë e përshkallëzimit rajonal nga Irani ose partnerët e Iranit. Sekretari Lloyd Austin urdhëroi rregullime në pozicionin e ushtrisë amerikane për të përmirësuar mbrojtjen e forcave amerikane, për të rritur mbështetjen për mbrojtjen e Izraelit dhe për të siguruar që Shtetet e Bashkuara të jenë të gatshme t'i përgjigjen një sërë situatash të paparashikuara," tha zëdhënësja Sabrina Singh.
Kjo përfshin dërgimin e anijes luftarake USS Abraham Lincoln për të zëvendësuar USS Theodore Roosevelt. Ai është një aeroplanmbajtës që mban rreth 40 avionë luftarakë, të cilët tani po lëvizin nga Gjiri Persik në Gjirin e Omanit, drejt Izraelit.
"Kruisera dhe shkatërrues shtesë të mbrojtjes raketore balistike janë dërguar gjithashtu në rajon. Departamenti po merr gjithashtu hapa për të rritur gatishmërinë tonë për të vendosur mbrojtje shtesë raketore balistike me bazë tokësore”, shtoi Singh.
ShBA-ja do të dërgojë gjithashtu një skuadron luftarak shtesë në Lindjen e Mesme, duke rritur mbështetjen e saj ajrore mbrojtëse.
Singh tha se ShBA-ja mbetet e fokusuar në uljen e tensioneve në rajon dhe shtyrjen për një armëpushim si pjesë e një marrëveshjeje pengjesh për të sjellë robërit në shtëpi dhe për t'i dhënë fund luftës në Rripin e Gazës.
Urdhri erdhi një ditë pasi presidenti i ShBA-së Joe Biden dhe kryeministri izraelit Benjamin Netanyahu diskutuan vendosjen e ushtrisë amerikane për të mbështetur Izraelin në kundërpërgjigje të kërcënimeve. Presidenti i ShBA-së ripohoi angazhimin e tij për sigurinë e Izraelit kundër çdo kërcënimi nga Irani.
