Kosova iu bashkua përpjekjeve të shpëtimit pas tërmeteve të fuqishme të javës së kaluar në Türkiyen jugore si “shpagim” për ndihmën e Ankarasë në të kaluarën për Prishtinën, tha Ilir Gaxha nga Shoqata e Kosovës për Kërkim dhe Shpëtimit.
Gaxha, sekretar i Shoqatës, foli për Anadolun në aeroportin në provincën Hatay përpara se të nisej për t’u kthyer në Kosovë, me grupin e tij prej gjashtë vetash, pasi përfunduan misionin e tyre në zonën e tërmetit ku arritën më 9 shkurt.
Teksa ishin aty, Gaxha tha se ekipi i tij ndihmoi në përpjekjet e shpëtimit dhe se të martën (14 shkurt) i kanë shpëtuar jetën një vajze 3-vjeçare duke i dhënë ndihmën e parë.
“Ne u ndiem tmerrësisht kur e pamë. Kjo është arsyeja pse duhej të vinim dhe të jepnim kontributin tonë. Türkiye në të kaluarën i ka ndihmuar shumë vendit tim, Kosovës. Dhe kjo është mënyra jonë për të shpaguar atë që e konsiderojmë si borxh”, tha ai.
Gaxha qëndrimin në Hatay e vlerësoi si mision të suksesshëm.
“Është e trishtueshme të shohësh gjithë qytetin të shkatërruar”, tha Gaxha, duke shtuar se familjet e viktimave që kishin mbetur nën rrënojat e ndërtesave të shkatërruara kishin kërkuar nga ata që t’i nxjerrin trupat e të afërmve të tyre të vdekur.
Gjatë përpjekjeve për shpëtim ai theksoi se ekipi i tij kishte nxjerrë më shumë se 20 kufoma dhe kishte ndaluar numërimin në një moment të caktuar. Vetëm më 14 shkurt, siç shprehet Gaxha, kishin nxjerrë nëntë trupa të pajetë nga rrënojat e tërmetit.
“Ishte e trishtueshme të shihje, për shembull, në një thes gjumi, një nënë dhe baba që kishin mbuluar dy fëmijët dhe të katër ishin të vdekur nga tërmeti së bashku. Ishte një histori e tmerrshme”, rrëfen Gaxha.
“Në një rast nxorëm djalin dhe vajzën e një burri dhe kur ia dorëzuam (trupat) babait, ai qante dhe lotonte. Ende nuk mund ta harroj mënyrën se si qante”, shtoi ai.
Në lidhje me shpëtimin e 3-vjeçares, Gaxha tha se vajza u nxor nga një ekip tjetër dhe fillimisht mendohej se ishte e vdekur, por më pas njëri nga ushtarët turq kishte vërejtur se vogëlushja kishte lot në sy.
“Ne aplikuam CPR (Reanimin kardiopulmonar) për rreth 25 deri në 30 minuta derisa erdhi ambulanca turke. Kishte disa vajza të reja të cilat ishin në panik kur panë fëmijën e vogël”, tha ai.
“Dhe ne ishim të fortë, duke bërë këtë procedurë gjatë gjithë kohës, derisa e futëm në ambulancë. Dhe pastaj u emocionuam shumë pasi e përjetuam atë ndjenjë”, u shpreh Gaxha.
Më pas, me t’u kuptuar se vajza kishte shpëtuar, të gjithë u përqafuan dhe u puthën, rrëfeu Gaxha.
“Të gjithë ishin shumë të lumtur. Pra, është një ndjenjë që nuk mund ta shpjegojmë. Jemi shumë krenarë që arritëm të përfaqësojmë vendin tonë dhe t'i ndihmojmë Türkiyes”, tha Ilir Gaxha nga Shoqata e Kosovës për Kërkim dhe Shpëtim.
