Türkiye po “fillon një proces të ri” me ShBA-në, tha presidenti turk Recep Tayyip Erdoğan, teksa u takua me homologun e tij amerikan Joe Biden të martën.
Erdoğan u takua me Bidenin në margjinat e samitit të NATO-s në Vilnius, kryeqyteti i Lituanisë.
Presidenti turk tha se takimet e mëparshme me Bidenin ishin “sesione ngrohëse”, duke shtuar: “Tani po fillojmë një proces të ri”.
Erdoğan deklaroi se beson se është koha për konsultime në nivel të krerëve të shteteve me ShBA-në si pjesë e mekanizmit strategjik.
“Unë e konsideroj këtë takim si hapin e parë drejt kësaj”, shtoi ai.
Biden falënderoi Erdoğanin për udhëheqjen e tij dhe kryerjen e diplomacisë në procesin e anëtarësimit të Suedisë në NATO, duke thënë se mezi pret të takohet sërish me presidentin turk.
Pranimi i Suedisë në NATO pas Finlandës është një nga pikat kryesore të agjendës së samitit.
Të hënën, Sekretari i Përgjithshëm i NATO-s Jens Stoltenberg njoftoi se Türkiye ka rënë dakord të dërgojë Protokollin e pranimit të Suedisë në NATO në parlament pas një takimi trepalësh midis tij, Erdoğanit dhe kryeministrit suedez Ulf Kristersson.
Takimi me dyer të mbyllura u zhvillua në Qendrën e Ekspozitave dhe të Kongreseve Lituaneze (LITEXPO), vendi i takimit dyditor të NATO-s që filloi më parë gjatë ditës.
Më herët, Erdoğan u takua edhe me homologun e tij francez Emmanuel Macron, kryeministrin britanik Rishi Sunak, kryeministrin kanadez Justin Trudeau, kryeministren italiane Giorgia Meloni dhe kancelarin gjerman Olaf Scholz.
31 udhëheqësit e aleancës ushtarake po takohen për të diskutuar luftën në Ukrainë, anëtarësimin e Suedisë në NATO dhe hapat për të forcuar mbrojtjen dhe parandalimin e grupit, ndër të tjerash.
Türkiye ka qenë anëtare e NATO-s për më shumë se 70 vjet dhe krenohet me ushtrinë e saj të dytë më të madhe.
