Pasi një anije mallrash ruse u fundos në brigjet spanjolle për shkak të një shpërthimi në dhomën e motorit, 14 persona u shpëtuan, njoftoi të martën Qendra e Situatës dhe Krizave në Ministrinë e Jashtme ruse.
"Anija ruse e mallrave Ursa Major (në pronësi të SK-YUG LLC) u fundos në ujërat ndërkombëtare të Detit Mesdhe pas një shpërthimi në dhomën e motorit. Nga 16 anëtarët e ekuipazhit, qytetarë të Federatës Ruse, 14 persona u shpëtuan dhe dy janë të zhdukur”, njoftoi qendra në Telegram.
Ata shtojnë se shërbimi i shpëtimit i çoi njerëzit e mbijetuar në portin e Cartagena në Murcia.
Ministria ruse e Transportit dhe misionet diplomatike po monitorojnë nga afër situatën dhe janë të gatshme të ofrojnë gjithë ndihmën e nevojshme, thuhet në deklaratë.
Mediat spanjolle raportuan se një anije ruse kishte pësuar një përmbysje në ujërat ndërkombëtare midis Murcias dhe Algjerisë.
Anija thuhet se është nisur nga Shën Petersburg rreth dy javë më parë dhe po shkonte drejt portit të Vladivostok, ku do të mbërrinte më 22 janar.
