Sekretari amerikan i Shtetit Antony Blinken u takua me homologun e tij të Katarit të martën në mes të përpjekjeve për të arritur një armëpushim gjashtëjavor midis Izraelit dhe Hamasit në këmbim të një marrëveshjeje për të burgosurit.
"Ekziston një mundësi për një armëpushim të menjëhershëm që mund t'i sjellë pengjet në shtëpi, e cila mund të rrisë në mënyrë dramatike sasinë e ndihmave humanitare që arrijnë te palestinezët që kanë aq shumë nevojë për të dhe mund të krijojë terrenin për një zgjidhje të qëndrueshme", tha Blinken përpara takimit me Shejh Mohammed bin Abdulrahman Al-Thani në Departamentin e Shtetit.
Siç tha ai, "i takon Hamasit të marrë vendime nëse është gati t'i bashkohet armëpushimit".
Blinken vuri në dukje gjithashtu se ShBA-ja do të vazhdojë të ushtrojë presion ndaj Izraelit për të maksimizuar "të gjitha mjetet e mundshme" për të ofruar ndihma humanitare në Gaza dhe për të siguruar që ajo të mund të arrijë njerëzit që kanë nevojë për të.
Al-Thani, i cili është kryeministër dhe ministër i Jashtëm i Katarit, tha se Katari do të vazhdojë të punojë me partnerët e tij për të arritur një marrëveshje armëpushimi.
"Ne duam të shohim një fund të vuajtjeve humanitare. Ne duam që pengjet të kthehen në familjet e tyre”, tha kryeministri i Katarit.
Në një deklaratë të përbashkët, të dyja vendet thanë se Blinken dhe Al-Thani u takuan si pjesë e Dialogut të gjashtë Strategjik ShBA-Katar dhe diskutuan një gamë të gjerë temash - nga bashkëpunimi ekonomik dhe i sigurisë te teknologjia.
Blinken vlerësoi përpjekjet ndërmjetësuese të Katarit për të "lehtësuar ndihmën humanitare për civilët në Gaza dhe për të siguruar lirimin e pengjeve, përfshirë qytetarët amerikanë, të mbajtur nga Hamasi", thuhet në deklaratë.
ShBA-ja, Katari dhe Egjipti kanë punuar prej javësh për të arritur një marrëveshje në të cilën Hamasi do të lironte deri në 40 të burgosur dhe Izraeli do të lironte disa të burgosur palestinezë në këmbim të një armëpushimi gjashtëjavor.
Zëdhënësi i Hamasit, Jihad Taha, tha se "topi është në fushën e Izraelit", duke shtuar se ata janë "të hapur ndaj propozimeve dhe iniciativave që janë në përputhje me pozicionin e tyre, si dhe bëjnë thirrje për armëpushim, kthimin e të zhvendosurve, hyrjen e autokolonave të ndihmës dhe rindërtim”.
Ai tha se Izraeli deri më tani ka refuzuar kërkesat e Hamasit për të lejuar kthimin e njerëzve që ikën nga Gaza veriore dhe garancitë për një armëpushim afatgjatë dhe një tërheqje të plotë izraelite nga Gaza.
