Qeveria e Izraelit në mënyrë aktive dhe të qëllimshme po i minon institucionet e Kombeve të Bashkuara, tha Tanja Fajon, Zëvendëskryeministrja e Qeverisë së Sllovenisë dhe Ministre e Punëve të Jashtme dhe Evropiane.
Këtë e deklaroi Fajon duke folur për marrëdhëniet e Sllovenisë me Izraelin dhe Palestinën gjatë konflikteve ushtarake në Lindjen e Mesme.
“Unë jam ndër të parët që mbroj një embargo për eksportet e armëve në Izrael”, tha Fajon në një intervistë për RTV Slloveni.
Ajo theksoi se janë duke u shqyrtuar edhe opsionet ligjore për ndalimin e importit të produkteve nga vendbanimet ilegale izraelite.
“Është shumë e qartë se qeveria e Izraelit në mënyrë aktive dhe të qëllimshme po i minon institucionet e Kombeve të Bashkuara, duke filluar me agjencinë UNRWA, duke e shpallur Sekretarin e Përgjithshëm të Kombeve të Bashkuara persona non grata dhe duke shpërfillur rezolutat dhe vendimet e gjykatave", tha Fayon.
Ajo vuri në dukje se për muaj të tërë ka përsëritur se Izraeli në mënyrë të përsëritur shkel ligjin ndërkombëtar dhe Kartën e Kombeve të Bashkuara.
“Më shumë se 41 mijë civilë janë vrarë në Gaza. Gaza është skena më e zezë e viktimave që nga Lufta e Dytë Botërore. Për sa u përket sulmeve të Izraelit në Libanin jugor, ne kemi dënuar shumë qartë forcat izraelite, duke përfshirë sulmet ndaj forcave UNIFIL dhe zgjerimin e operacionit tokësor që në fillim”, theksoi Fajon.
