Gjermania i bëri thirrje Izraelit të hënën që ta lejojë hyrjen e Kryqit të Kuq Ndërkombëtar për ta vizituar drejtorin e rrëmbyer të spitalit Kamal Adwan me bazë në Gaza, por nuk kërkoi lirimin e tij.
“Ne kërkojmë që Hussam Abu Safiya, drejtori i spitalit Kamal Adwan, të trajtohet sipas standardeve ndërkombëtare, të ketë akses në Kryqin e Kuq Ndërkombëtar dhe të ketë akses në mbështetje ligjore”, u tha gazetarëve në Berlin zëvendëszëdhënësi i Ministrisë së Jashtme Christian Wagner.
I pyetur nëse vendi i tij do ta mbështeste lirimin e mjekut, Wagner tha thjesht se tri kërkesat e lartpërmendura ishin ato që kërkonte qeveria e tij.
Vërejtjet e Wagnerit vijnë pas thirrjeve nga kreu i Organizatës Botërore të Shëndetësisë (OBSh), i cili i kërkoi Izraelit ta lirojë Abu Safiya.
“Spitali Kamal Adwan në Gazën e Veriut mbetet plotësisht jashtë funksionit dhe ne nuk kemi marrë asnjë përditësim mbi sigurinë dhe mirëqenien e drejtorit të tij, dr. Hussam Abu Safiya që nga rrëmbimi i tij më 27 dhjetor”, shkroi Tedros Adhanom Ghebreyesus në X.
"Ne vazhdojmë t'i bëjmë thirrje Izraelit ta lirojë atë. E përsërisim: sulmet ndaj spitaleve dhe profesionistëve shëndetësorë duhet të marrin fund. Njerëzit në Gaza kanë nevojë për qasje në kujdesin shëndetësor," shtoi Tedros, duke përsëritur thirrjen e tij për një armëpushim.
Abu Safiya u arrestua nga forcat izraelite së bashku me të tjerë gjatë një bastisjeje në spital më 27 dhjetor.
Ushtria izraelite ka vazhduar luftën gjenocidale në Gaza, që ka vrarë më shumë se 45.800 njerëz, kryesisht gra dhe fëmijë, që nga 7 tetori 2023, pavarësisht nga rezoluta e Këshillit të Sigurimit të OKB-së që bën thirrje për një armëpushim të menjëhershëm.
Në nëntor, Gjykata Ndërkombëtare Penale (GjNP) lëshoi urdhra arresti për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një lëndë gjenocidi në Gjykatën Ndërkombëtare të Drejtësisë për luftën e tij vdekjeprurëse në enklavë.
