Rafah është thelbi i operacionit të ndihmës humanitare dhe UNRWA-ja është shtylla kurrizore e kësaj përpjekjeje, tha Sekretari i Përgjithshëm i OKB-së, Antonio Guterres, para Këshillit të të Drejtave të Njeriut në Gjenevë.
Ai paralajmëroi se një ofensivë e gjithanshme izraelite në qytetin në Rripin jugor të Gazës do të ishte tmerruese për më shumë se një milion civilë palestinezë që janë strehuar atje nga sulmet izraelite.
“Një ofensivë e tillë do të vendoste gozhdën e fundit në arkivolin e programeve tona të ndihmës. Unë përsëris thirrjen time për një armëpushim humanitar dhe lirimin e menjëhershëm dhe pa kushte të të gjitha pengjeve”, tha shefi i OKB-së Guterres.
Duke vënë në dukje se Këshilli i Sigurimit i OKB-së është shpesh i bllokuar dhe i paaftë për të vepruar për çështjet më të rëndësishme të paqes dhe sigurisë së kohës sonë - ai tha se mungesa e unitetit të këshillit për situatën në Ukrainë dhe Gaza mund të ketë dëmtuar përfundimisht autoritetin e tij.
Ai tha se Samiti i ardhshëm, ku do të diskutohet për një agjendë të re për paqen, në shtator është një mundësi për një ripërcaktim të tillë.
