Krahu ushtarak i Hamasit, Brigadat Al-Qassam, ka bërë të ditur se komandanti i saj i përgjithshëm Mohammed Deif është vrarë.
Zëdhënësi i Brigadave Al-Qassam, Abu Ubaida, në një deklaratë televizive tha se gjashtë anëtarë të tjerë të këshillit ushtarak të Brigadave Al-Qassam u vranë së bashku me Deifin.
Mes personave të vrarë janë zëvendësi i tij, Marwan Issa dhe komandantët e lartë Ghazi Abu Tamah, Raed Thabit, Rafi Salama, Ahmad Ghundour dhe Ayman Nofal.
Ubaida kujtoi se grupi më parë ka njoftuar vdekjen e Ahmad Ghundour-it, komandantit të grupit në Gazën veriore dhe Ayman Nofalit gjatë gjenocidit të Izraelit në Rripin e Gazës.
Ai shtoi se njoftimi erdhi vetëm pas përfundimit të procedurave të nevojshme, adresimit të shqetësimeve të sigurisë të diktuara nga kushtet e fushëbetejës dhe verifikimit të detajeve.
Deklarata vjen më shumë se shtatë muaj pasi ushtria izraelite tha se ka vrarë Deifin në Gaza.
Në atë kohë, mediat raportuan vdekjen e Deifit, por njoftimi i sotëm është njohja e parë zyrtare nga Hamasi për vdekjen e udhëheqësit të lartë.
