Të paktën 30 palestinezë janë vrarë në rajonin Deir al-Balah në pjesën qendrore të Gazës gjatë 24 orëve fundit, thanë zyrtarët lokalë.
Ushtria izraelite kreu sulme ajrore në shtëpitë e civilëve në Deir al Balah dhe bombardoi një xhami në të njëjtën zonë, tha zyra për media e qeverisë në Gaza.
Duke vënë në dukje se sulmi ishte pjesë e "luftës gjenocidale të Izraelit" kundër civilëve në Gaza, në njoftim thuhet se komuniteti ndërkombëtar dhe administrata amerikane, e cila ua dha dritën jeshile masakrave, ishin përgjegjës për aktin.
Izraeli ka nisur një ofensivë vdekjeprurëse në Gaza pas një sulmi të 7 tetorit nga grupi palestinez Hamas, duke vrarë të paktën 27.365 palestinezë dhe duke plagosur 66.630 të tjerë, ndërsa rreth 1.200 izraelitë besohet se janë vrarë në sulmin e Hamasit.
Ofensiva izraelite ka shkaktuar pasoja të rënda për jetën e rreth dy milionëve civilëve të rrethuar.
Agjencia e OKB-së për Refugjatët Palestinezë në Lindjen e Afërt (UNRWA) njoftoi se njerëzit vazhdojnë të vdesin para syve të botës në katastrofën e pashembullt që përjetohet në Rripin e Gazës ku Izraeli ka detyruar popullatën në uri të skajshme dhe pa ujë.
