Sulmi i mundshëm ndaj Iranit "do të jetë vdekjeprurës, i saktë dhe veçanërisht befasues", ka deklaruar ministri izraelit i Mbrojtjes, Yoav Gallant.
"Ata nuk do të kuptojnë se çfarë ndodhi apo si ndodhi, por do t'i shohin rezultatet", u ka thënë ai anëtarëve të një divizioni brenda Inteligjencës ushtarake izraelite përgjegjëse për mbledhjen e të dhënave vizuale, njoftohet nëpërmjet një deklarate nga zyra e tij.
"Ju keni parë sulmet e fundit nga iranianët, të cilat ishin agresive, por dështuan sepse ishin të pasakta. Asnjë aset i forcës ajrore nuk u dëmtua, asnjë avion nuk u dëmtua dhe asnjë ushtar apo civil nuk u plagos", tha Gallant.
Në fillim të tetorit, Izraeli raportoi se Irani lëshoi rreth 180 raketa në një sulm që Teherani e përshkroi si "kundërpërgjigje" për vrasjen e shefit të Hamasit Ismail Hanije, të Hezbollahut Hassan Nasrallah dhe komandantit të Gardës Revolucionare iraniane Abbas Nilforoushan.
Ushtria izraelite pranoi të nesërmen se sulmi kishte shkaktuar dëme në bazat e saj ajrore.
Zyrtarët izraelitë më vonë thanë se përgatitjet për një përgjigje të rëndësishme dhe të fuqishme kundër Teheranit ishin në vazhdim, duke u zotuar për kundërpërgjigje.
Sipas mediave izraelite, kryeministri izraelit Benjamin Netanyahu mbajti një konsultim të kufizuar të sigurisë të martën vonë me disa ministra të kabinetit dhe zyrtarë të lartë të sigurisë për të diskutuar operacionin kundër Iranit.
Zhvillimet vijnë ndërsa Izraeli po kryen sulme masive ajrore në gjithë Libanin kundër atyre që thotë se janë objektiva të Hezbollahut që nga 23 shtatori, duke vrarë më shumë se 1.250 njerëz, duke plagosur 3.618 dhe duke zhvendosur më shumë se 1,2 milion njerëz.
