Pesë palestinezë, përfshirë gra dhe fëmijë, u vranë dhe disa të tjerë u plagosën të shtunën kur forcat izraelite bombarduan një tendë që strehonte civilë të zhvendosur në perëndim të Khan Younis në Gazën jugore.
Burimet mjekësore thanë për Anadolu se viktimat ishin nga një familje e vetme dhe vrasjet e tyre ndodhën pasi një helikopter izraelit shënjestroi tendën në zonën Al-Mawasi, në veriperëndim të Khan Younis.
Sipas Departamentit të Mbrojtjes Civile të Gazës, numri i të vdekurve në Gaza u rrit në 122 palestinezë, duke përfshirë 33 fëmijë dhe 33 gra, që nga shpallja e marrëveshjes së armëpushimit të mërkurën.
Rajoni Al-Mawasi, i përcaktuar nga ushtria izraelite si një "zonë e sigurt humanitare", ka parë sulme të përsëritura ndaj civilëve të zhvendosur pavarësisht garancive të tilla.
Sipas dëshmitarëve okularë, forcat izraelite filluan gjithashtu sulme artilerie dhe ajrore në pjesë të tjera të Khan Younis.
Në Gazën qendrore, një dron izraelit hodhi një bombë në një shtëpi pranë spitalit Al-Awda në kampin e refugjatëve Nuseirat duke i vënë flakën ndërtesës. Granatime sporadike u raportuan gjithashtu në Nuseirat veriperëndimore.
Gaza veriore pa një vazhdim të bombardimeve të rënda, veçanërisht në Jabalia, ku forcat izraelite kanë shkatërruar ndërtesa banimi dhe kanë kryer një operacion intensiv ushtarak për më shumë se tre muaj.
Dhuna erdhi mes përgatitjeve për zbatimin e një marrëveshje armëpushimi dhe shkëmbimi të të burgosurve të ndërmjetësuar nga Katari, Egjipti dhe ShBA-ja.
Katari njoftoi një marrëveshje armëpushimi trefazor të mërkurën për t'i dhënë fund mbi 15 muajve të sulmeve vdekjeprurëse izraelite në Rripin e Gazës me armëpushimin e vendosur të hyjë në fuqi të dielën në orën 630 GMT.
Gati 46.900 palestinezë, kryesisht gra dhe fëmijë u vranë dhe më shumë se 110.600 u plagosën në luftën gjenocidale të Izraelit në Gaza që nga 7 tetori 2023, sipas autoriteteve lokale shëndetësore.
Gjykata Ndërkombëtare Penale lëshoi urdhër-arrest në nëntor për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë.
