Katari raportoi një "atmosferë pozitive" të martën për t'i nisur negociatat për fazën e dytë të marrëveshjes për armëpushim në Gaza midis Izraelit dhe Hamasit.
"Ka një atmosferë pozitive që mund të inkurajojë nisjen e fazës së dytë të marrëveshjes për armëpushimin në Gaza," tha zëdhënësi i Ministrisë së Jashtme, Majed Al-Ansari, në një konferencë shtypi në Dohë.
Megjithatë, ai theksoi se negociatat nuk kanë nisur ende, duke shprehur shpresën se ato do të fillojnë "shumë shpejt."
Ansari tha se fluksi i ndihmave humanitare në Gaza ishte "i pamjaftueshëm," duke theksuar se "nuk duhet të kthehet në një kartë negociatash."
Ministri i Jashtëm i Izraelit, Gideon Sa’ar, tha herët të martën se negociatat për fazën e dytë të marrëveshjes për Gazën do të nisin këtë javë.
Sa’ar tha se Izraeli do të kërkojë një "demilitarizim të plotë" të Rripit të Gazës, sipas gazetës The Jerusalem Post.
Faza e parë e marrëveshjes për armëpushimin dhe shkëmbimin e të burgosurve ka qenë në fuqi që nga 19 janari, duke ndërprerë luftën gjenocidale të Izraelit që ka vrarë gati 48.300 palestinezë dhe ka lënë enklavën në shkatërrim.
Sipas marrëveshjes, deri tani janë liruar 19 robër izraelitë dhe pesë punëtorë tajlandezë në këmbim të 1.135 të burgosurve palestinezë.
Gjykata Ndërkombëtare e Krimeve ka lëshuar urdhra arresti në nëntor të vitit të kaluar për Kryeministrin izraelit Benjamin Netanyahu dhe ish-Ministrin e Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij ndaj enklavës.
