Këshilli i Sigurimit i OKB-së miratoi të premten një rezolutë që bën thirrje për "hapa urgjentë" për të lejuar menjëherë aksesin humanitar "të sigurt, të papenguar dhe të zgjeruar" në Gaza në mes të ofensivës së vazhdueshme izraelite.
Pas disa ditësh negociatash intensive dhe vonesash, rezoluta e paraqitur nga Emiratet e Bashkuara Arabe kaloi me një votim 13-0, me ShBA-në dhe Rusinë – të dyja anëtarë të përhershëm të këshillit – që abstenuan.
Rezoluta kërkon që palët në konflikt të lejojnë dhe të lehtësojnë përdorimin e të gjitha rrugëve të disponueshme dhe në gjithë Rripin e Gazës, duke përfshirë pikat kufitare, për të siguruar që personeli humanitar dhe ndihma të arrijnë te popullata civile në nevojë.
Rezoluta kërkon që Sekretari i Përgjithshëm i OKB-së Antonio Guterres të caktojë një "koordinator të lartë humanitar dhe për rindërtim" për të përshpejtuar dërgimin e ndihmës humanitare për popullsinë civile në Gaza.
Që nga 7 tetori, një numër rezolutash të Këshillit të Sigurimit mbi konfliktin nuk u miratuan për shkak të vetos nga anëtarët e tij të përhershëm, duke bërë që disa liderë dhe vëzhgues botërorë të vënë në dyshim efektivitetin e Këshillit.
Që nga 7 tetori, ushtria izraelite ka zhvilluar një luftë shkatërruese në Gaza, duke rezultuar në 20.057 të vdekur dhe 53.320 të plagosur deri më tani, shumica prej tyre fëmijë dhe gra. Kjo ka shkaktuar dëme të mëdha në infrastrukturë dhe një katastrofë të paprecedentë humanitare, sipas burimeve palestineze dhe ndërkombëtare.
