Kryeministri izraelit Benjamin Netanyahu po e zgjat luftën në Rripin e Gazës për të qëndruar në pushtet, tha të mërkurën ministri i Jashtëm palestinez Riyad al-Maliki.
"Netanyahu nuk është i interesuar për armëpushim. Përkundrazi, ai dëshiron të zgjasë luftën sa më gjatë që të jetë e mundur për të qëndruar në pushtet", tha Al-Maliki gjatë një takimi me ambasadorin e Afrikës së Jugut Sean Benfeldt në selinë e Ministrisë së Punëve të Jashtme në Ramallah, raportoi agjencia palestineze e lajmeve WAFA.
Ai tha se Izraeli "po përdor ndërprerjen e ushqimeve si një armë lufte, sepse pothuajse 600.000 palestinezë janë në prag të urisë".
Kryediplomati palestinez shprehu zhgënjimin me komunitetin ndërkombëtar që nuk bëri sa duhet për të ushtruar presion ndaj Netanyahut.
Ai vuri në dukje rrezikun e sulmeve të përditshme izraelite në kampet palestineze në Bregun Perëndimor, duke shkatërruar infrastrukturën dhe duke vrarë palestinezë.
Po ashtu ai foli edhe për padinë për gjenocid që Republika e Afrikës së Jugut ngriti kundër Izraelit në dhjetor para Gjykatës Ndërkombëtare të Drejtësisë.
Al-Maliki pohoi se "kjo përpjekje ligjore, humanitare dhe morale është e një rëndësie të madhe për të ekspozuar korrupsionin e botës dhe standardet e dyfishta të saj".
Ministri palestinez shtoi se "masat e përkohshme të nxjerra nga gjykata (në janar) janë shumë të rëndësishme për të treguar se Izraeli vazhdon me krimet e tij në Rripin e Gazës".
Më 26 janar, pas një padie për gjenocid të ngritur nga Republika e Afrikës së Jugut, Gjykata Ndërkombëtare e Drejtësisë vendosi që Izraeli duhet të përmbahet nga çdo veprim në lidhje me vrasjen, sulmet dhe shkatërrimin e banorëve të Rripit të Gazës dhe të marrë të gjitha masat për të parandaluar gjenocid.
Sulmet, megjithatë, vazhdojnë të pandërprera dhe dërgimi i ndihmave mbetet i pamjaftueshëm për të trajtuar katastrofën humanitare.
Numri i palestinezëve të vrarë në ofensivën vdekjeprurëse për gjenocid të akuzuar nga Izraeli në Rripin e Gazës që nga 7 tetori i vitit të kaluar është rritur në 31.272, njoftoi të mërkurën Ministria e Shëndetësisë e enklavës palestineze.
