Hamasi po kërkon lirimin e tre liderëve të lartë palestinezë në çdo marrëveshje për shkëmbimin e pengjeve me Izraelin, njoftuan mediat izraelite të enjten.
"Hamasi këmbëngul që Marwan Barghouti, Ahmed Saadat dhe Abdullah Barghouti të jenë në listën e të burgosurve që do të lirohen në çdo marrëveshje të re", raportoi gazeta Yedioth Ahronoth.
Barghouti (64), një anëtar i Komitetit Qendror të Fatahut, është favoriti më i madh për të kryesuar Autoritetin Palestinez me bazë në Ramallah pas Presidentit Mahmud Abbas, sipas sondazheve palestineze.
Izraeli e arrestoi atë në vitin 2002 dhe e dënoi me burgim të përjetshëm.
"Barghouti mund të ndryshojë fytyrën e Autoritetit Palestinez", tha gazeta.
Sekretari i përgjithshëm i Frontit Popullor për Çlirimin e Palestinës (PFLP), Ahmed Saadat, u arrestua në vitin 2008 dhe u dënua me 30 vjet burg për vrasjen e ministrit izraelit të Turizmit Rehavam Ze'evi në vitin 2001.
Abdullah Barghouti është lideri më i lartë i Hamasit dhe ka marrë disa herë burgim të përjetshëm për një seri sulmesh ndaj izraelitëve.
Izraeli refuzoi të përfshijë tre liderët si pjesë e një marrëveshjeje të mëparshme të shkëmbimit të të burgosurve me Hamasin në vitin 2011, në të cilën ushtari izraelit Gilad Shalit u lirua në këmbim të më shumë se 1.000 të burgosurve palestinezë.
Qeveria izraelite nuk e komentoi raportin e mediave.
Shefi politik i Hamasit, Ismail Haniyeh, mbërriti në Kajro të mërkurën në mes të përpjekjes së Egjiptit për të ndërmjetësuar një marrëveshje të re shkëmbimi pengjesh midis grupit palestinez dhe Izraelit.
Gjatë një pauze humanitare njëjavore në konfliktin Izrael-Hamas për shkëmbimin e të burgosurve muajin e kaluar, Hamasi liroi 81 izraelitë dhe 24 të huaj në këmbim të 240 palestinezëve, përfshirë 71 gra dhe 169 fëmijë.
Rreth 130 izraelitë u kapën nga Hamasi në Rripin e Gazës gjatë një sulmi ndërkufitar më 7 tetor.
Pas kësaj, Izraeli sulmoi Rripin e Gazës, duke vrarë pothuajse 20.000 palestinezë, kryesisht gra dhe fëmijë, dhe duke plagosur 52.586.
