Kryeministri izraelit Benjamin Netanyahu ka refuzuar të aprovojë hyrjen e shtëpive të lëvizshme dhe pajisjeve të rënda në Rripin e Gazës, pavarësisht një marrëveshjeje armëpushimi, raportuan të dielën mediat izraelite.
Sipas transmetuesit publik izraelit KAN, duke cituar një burim të paidentifikuar, Netanyahu ka refuzuar lejen për futjen e makinerive të rënda të nevojshme për të pastruar rrënojat e ndërtesave të shkatërruara në enklavë.
Qindra mijëra palestinezë janë lënë të pastrehë pas sulmeve izraelite që kanë vrarë më shumë se 48.200 njerëz, kryesisht gra dhe fëmijë, duke lënë Gazën në një gjendje katastrofike.
Zyra e medias e qeverisë së Gazës konfirmoi se shtëpitë e lëvizshme dhe makineritë e rënda nuk janë lejuar të hyjnë në enklavë.
"Mosrespektimi i Izraelit ndaj detyrimeve të tij sipas marrëveshjes dhe protokollit humanitar paraqet një sfidë të madhe për ndërmjetësuesit, të cilët duhet të ushtrojnë më shumë presion ndaj okupatorit për të siguruar që këto angazhime të përmbushen," tha Ismail al-Thawabtah, kreu i zyrës së medias, për Anadolu.
"Izraeli po vazhdon të vonojë hyrjen e pajisjeve të nevojshme në enklavë, duke përkeqësuar më tej krizën humanitare," shtoi ai.
"Deri më tani, asnjë shtëpi e lëvizshme (karavan) apo makineri e rëndë e nevojshme për rindërtimin e infrastrukturës së shkatërruar nga Izraeli nuk ka mbërritur në Rripin e Gazës," tha Thawabtah.
Ai i bëri thirrje komunitetit ndërkombëtar të "ushtrojë presion të vërtetë mbi Izraelin për ta detyruar të zbatojë kushtet e marrëveshjes."
Grupi palestinez i rezistencës Hamas liroi tri pengje izraelite të shtunën pasi mori garanci nga ndërmjetësuesit për heqjen e pengesave për hyrjen e shtëpive të lëvizshme për civilët e zhvendosur dhe pajisjeve të rënda të nevojshme për pastrimin e rrënojave.
Autoritetet lokale palestineze kanë akuzuar Izraelin për shkelje të protokollit humanitar të marrëveshjes së armëpushimit duke refuzuar qasjen në materialet e ndihmës, përfshirë tendat dhe karavanët për civilët e zhvendosur në Gaza.
Në fazën e parë të marrëveshjes për Gazën, e cila hyri në fuqi më 19 janar, janë liruar 19 pengje izraelite dhe pesë punëtorë tajlandezë në këmbim të 1.135 të burgosurve palestinezë.
