Mjekët palestinezë dhe ekipet e shpëtimit nxorrën pesë trupa të tjerë nga rrënojat në Rripin e Gazës, duke e çuar numrin e përgjithshëm të të vdekurve nga lufta gjenocidale e Izraelit që nga tetori 2023 në 48.346, tha të hënën Ministria e Shëndetësisë.
Në deklaratën e ministrisë u tha se bilanci përfshinte edhe dy palestinezë të vrarë nga zjarri i ushtrisë izraelite në 24 orët e fundit.
Rreth 111.759 të tjerë u plagosën në sulmet izraelit në Gaza që nga tetori 2023, shtoi Ministria e Shëndetësisë.
“Shumë viktima janë ende të bllokuar nën rrënoja dhe në rrugë pasi ekipet e shpëtimit nuk janë në gjendje të arrijnë deri tek ta,” tha ministria.
Që nga 19 janari, në Gaza ka qenë në fuqi një marrëveshje armëpushimi, e cila ka ndalur luftën izraelite, që ka shkaktuar shkatërrim të gjerë dhe ka lënë enklavën palestineze në gërmadha.
Pavarësisht armëpushimit, autoritetet lokale të Gazës raportuan pothuajse çdo ditë shkelje të armëpushimit nga ushtria izraelite.
Gjykata Ndërkombëtare Penale lëshoi urdhra arresti në nëntor të vitit të kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën e tij në enklavë.
