Drejtori i Organizatës Botërore të Shëndetësisë (OBSh) për Emergjencat Globale, Mike Ryan, tha se 17 nga 36 spitalet në Rripin e Gazës janë pjesërisht duke ofruar shërbime.
Ryan paralajmëroi për situatën gjithnjë e më të vështirë shëndetësore në Rripin e Gazës, i cili është nën sulme intensive izraelite.
Ai theksoi se spitalet në Gaza janë në rrezik të madh për shkak të dëmtimit fizik, mungesës së karburantit, furnizimeve të kufizuara mjekësore dhe humbjes së personelit.
Ryan vuri në dukje se sulmet ndaj objekteve dhe shërbimeve shëndetësore në Rripin e Gazës vazhdojnë, ku sistemi shëndetësor është shkatërruar kryesisht.
"OBSh-ja ka dokumentuar 1.098 sulme ndaj shërbimeve shëndetësore në territoret e pushtuara palestineze midis 7 tetorit 2023 dhe 22 gushtit 2024, nga të cilat 492 kanë ndodhur në Gaza," tha Ryan, duke shtuar se ato sulme rezultuan në 747 raste dhe 969 të plagosur.
Izraeli vazhdoi ofensivën e tij brutale në Rripin e Gazës pas një sulmi nga grupi palestinez Hamas më 7 tetor të vitit të kaluar, pavarësisht një rezolute të Këshillit të Sigurimit të Kombeve të Bashkuara që bën thirrje për një armëpushim të menjëhershëm.
Sulmet vranë më shumë se 40.600 palestinezë, kryesisht gra dhe fëmijë, ndërsa u plagosën më shumë se 93.800, sipas autoriteteve lokale shëndetësore.
Bllokada e Rripit të Gazës ka çuar në mungesa të mëdha të ushqimit, ujit të pastër dhe ilaçeve, dhe pjesa më e madhe e enklavës është në gërmadha.
Izraeli po përballet me akuza për gjenocid para Gjykatës Ndërkombëtare të Drejtësisë, e cila urdhëroi ndalimin e operacioneve ushtarake në qytetin jugor të Rafahut, ku më shumë se një milion palestinezë kërkuan strehim përpara se zona të sulmohej më 6 maj.
