Dy vëllezër palestinezë në qytetin suedez të Malmos kanë filluar të prodhojnë një pije freskuese të quajtur Palestine Cola, me qëllim që çdo fitim të shkojë për palestinezët.
Lufta brutale e Izraelit në Gaza nxiti protesta masive në mbarë botën dhe bojkotime të shumë markave ndërkombëtare proizraelite, duke përfshirë kompanitë kryesore të pijeve dhe kafesë dhe zinxhirët e ushqimit të shpejtë.
Mes fushatës mbarëbotërore për të bojkotuar prodhuesit perëndimorë që përfitojnë nga pushtimi i Gazës dhe Bregut Perëndimor nga Izraeli ose që mbështesin Izraelin në çfarëdo mënyre, Mohamed dhe Ahmad Hassoun panë një boshllëk tregu për shkak të kërkesës së lartë për zëvendësues për markat më të mëdha.
Kompania e tyre, Palestine Drinks, u lançua në shkurt, tha Mohamed Kiswani, zyrtari i shtypit për Safad Food AB, firma suedeze që qëndron pas saj.
Sipas kompanisë, Palestine Cola përfaqëson "një simbol të unitetit dhe qëllimit".
Familja Hassoun vjen nga qyteti i madh palestinez Safad, nga ku u dëbuan gjatë mandatit britanik në 1948.
Ata u detyruan të jetonin në kampet e refugjatëve në jug të Libanit, përpara se të zhvendoseshin përfundimisht në Suedi.
Në një ditë të ftohtë nëntori në Malmo, dy vëllezërit u ulën në përpjekje për të krijuar një projekt për të ndihmuar palestinezët, të cilët po përballen me një gjenocid që po kryhet nga Izraeli në Gaza.
Palestine Drinks filloi të merrte formë, me ndihmë të ekspertëve dhe konsulentëve që punonin për familjen, e cila zotëron një kompani të suksesshme makinash dhe pronash në Suedi, por pa përvojë të mëparshme në industrinë e ushqimit dhe pijeve.
“Tregu, restorantet, dyqanet dhe njerëzit donin alternativa për markat më të mëdha, kështu që ne menduam pse të mos e bënim një projekt bamirësie dhe ta quajmë Palestine Drinks, që njerëzit të kujtojnë emrin dhe të jenë krenarë për markën. Pra, kjo është arsyeja kryesore pse kjo ide erdhi në jetë," u shpreh Kiswani.
"Ne kemi lançuar një markë alternative për të gjithë ata që duan një kompani që mbështet palestinezët."
Përgjigje të paimagjinueshme
Krenarë për rolin e tij si një projekt për t'u ndihmuar palestinezëve, vëllezërit e panë këtë projekt fillimisht si nismë e vogël që synonte vetëm tregun suedez.
Megjithatë, kur pijet dolen në shitje, pati një reagim të papritur nga konsumatorët.
“Sapo nxorëm një milion kanaçe, ato u shitën menjëherë, pasi kjo markë tregton veten,” tregoi njëri nga vëllezërit, duke shtuar se kjo kishte ndodhur pasi njerëzit janë të sigurt se kjo nismë shërben për një kauzë të mirë.
Pijet shiten në Suedi, por porositë e tjera kanë ardhur edhe nga Evropa, ShBA-ja, Australia, Japonia, vendet arabe, pjesë të Azisë dhe madje edhe nga Amerika Latine.
Kompania mendon se qielli është kufiri për këtë brend dhe planet janë në proces të zgjerimit nga Skandinavia, me plan për ta disponuar Palestine Cola në vende të tjera brenda tre muajve të ardhshëm.
“Pra, ne kemi rreth 900 porosi nga kompani në të gjithë botën që duan t'i bashkohen nismës sonë. Nuk kemi pasur ende kohë për t'iu përgjigjur të gjitha emaileve”, tha Kiswani.
Pijet e kompanisë janë krijuar për të tërhequr të gjitha shijet, të disponueshme në shije origjinale, pa sheqer, portokalli dhe limonadë, si dhe një variant pije energjike.
“Vendosëm të shkojmë me aromën e kolas, e cila menduam se ishte më e shijshme se alternativat e tjera në treg sot,” shtoi ai.
Logoja e kanaçes përmban një pemë ulliri, një simbol palestinez që nga kohërat e lashta, si dhe një model fundi që tregonn keffiyeh palestineze, një emblemë historike e nacionalizmit palestinez.
“Pra, ideja kryesore këtu është të arrijmë në gjithë botën, që të gjithë të kujtojnë se Palestina është në kujtesën e kësaj familjeje dhe në kujtesën e çdo familjeje palestineze”, vijoi Kiswani.
