Ish-kryeministri i Britanisë Boris Johnson "mashtoi parlamentin me vetëdije" në lidhje me aferën "partygate", për festat e mbajtura në Downing Street që shkelën rregullat e COVID, sipas një raporti të ri nga një komitet zyrtar të enjten.
Komiteti i Privilegjeve në Parlament zbuloi se Johnson me vetëdije mashtronte parlamentin disa herë dhe se shkeljet e tij ishin mjaft serioze për të rekomanduar një pezullim 90-ditor, nëse ai ishte ende deputet, megjithëse hoqi dorë nga mandati javën e kaluar.
Në deklaratën e tij të dorëheqjes javën e kaluar, Johnson njoftoi se do të largohej me efekt të menjëhershëm dhe pretendoi se nuk gënjeu.
Ai më tej pohoi se "në zemrat e tyre komiteti e di" se ai tha të vërtetën. Komiteti ka hetuar shkeljet e tij të distancës sociale gjatë pandemisë në 2020 dhe 2021.
Raporti thoshte se mohimet e tij "ishin aq të pasinqerta saqë ishin përpjekje të qëllimshme për të mashtruar Komitetin".
Ai shtoi se Johnson kreu "përbuzje të përsëritura" dhe u përpoq të minonte procesin parlamentar, duke "mashtruar qëllimisht Dhomën", "duke mashtruar qëllimisht Komitetin", "duke shkelur besimin", "kundërshtuar Komitetin dhe në këtë mënyrë duke dëmtuar procesin demokratik të Dhomës", dhe "të qenët bashkëfajtor në fushatën e abuzimit dhe tentativës së frikësimit të Komitetit."
Komisioni tha gjithashtu se atij nuk duhet t'i jepen lejet për hyrje në parlament që u jepen ish-deputetëve.
Në reagim ndaj raportit, Johnson mohoi se ai e mashtronte qëllimisht Dhomën.
"Kjo është një gënjeshtër. Për të arritur në këtë përfundim të çmendur, Komisioni është i detyruar të thotë një sërë gjërash që janë absurde, ose të kundërshtuara me fakte," tha ai.
