Më shumë se 15 muaj bombardime të pamëshirshme izraelite kanë shkatërruar Rripin e Gazës dhe kanë shkaktuar një krizë të paprecedentë humanitare në enklavën palestineze.
Lufta brutale u ndërpre më 19 janar me një marrëveshje armëpushimi dhe shkëmbimi të të burgosurve midis Izraelit dhe fraksioneve palestineze në Rripin e Gazës.
Sipas të dhënave palestineze, ushtria izraelite ka hedhur më shumë se 100.000 tonë eksploziv në të gjithë Rripin e Gazës që nga 7 tetori 2023, duke shkatërruar dhe dëmtuar rreth 88 për qind të infrastrukturës dhe ndërtesave në enklavën palestineze.
Rreth 38 miliardë dollarë do të nevojiten për ta rindërtuar enklavën palestineze pas luftës izraelite.
Infrastruktura e shkatërruar e enklavës palestineze
Ushtria izraelite shkatërroi 161.600 njësi banimi, ndërsa dëme të mëdha materiale u shkaktuan në 81.000 të tjera, duke i bërë ato të pabanueshme.
Rreth 194.000 njësi banimi u dëmtuan pjesërisht, sipas të dhënave të publikuara nga Zyra e Medias e qeverisë në Gaza.
Në sulmet izraelite që nga 7 tetori 2023, u shkatërruan 216 ndërtesa qeveritare, 42 objekte sportive dhe 137 shkolla dhe universitete, ndërsa 357 shkolla dhe universitete u dëmtuan pjesërisht.
Të paktën 34 spitale u dëmtuan gjithashtu dhe janë jashtë shërbimit, ndërsa 162 objekte shëndetësore u goditën gjatë sulmeve izraelite.
Nuk u kursyen as vendet e adhurimit. U shkatërruan 832 xhami, u dëmtuan 158, si dhe u dëmtuan edhe tri kisha.
Ushtria izraelite shkatërroi gjithashtu 206 vende arkeologjike dhe 19 varreza në enklavë.
Sipas autoriteteve Palestineze, gjatë 15 muajve të sulmeve izraelite, u shkatërruan rrjetet e ujit dhe kanalizimeve, si dhe u dëmtuan edhe objektet e furnizimit me energji elektrike.
Përveç dëmeve materiale, sulmet izraelite vranë të paktën 47.000 palestinezë, kryesisht gra dhe fëmijë, dhe më shumë se 110.700 u plagosën, sipas autoriteteve lokale shëndetësore.
Gjatë sulmeve pa dallim izraelite, më shumë se 11.000 njerëz u zhdukën, me shkatërrim të gjerë dhe një krizë humanitare që mori jetën e shumë të moshuarve dhe fëmijëve në një nga fatkeqësitë më të këqija humanitare globale.
Nëntorin e kaluar, Gjykata Ndërkombëtare Penale (GjNP) lëshoi urdhërarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Rripin e Gazës.
Izraeli po përballet gjithashtu me një lëndë gjenocidi në Gjykatën Ndërkombëtare të Drejtësisë për luftën në enklavë.
