Zëdhënësja e Ministrisë së Jashtme ruse Maria Zakharova ka vlerësuar së fundmi Forumin e Diplomacisë në Antalya, duke e cilësuar si një vend më të mirë për të diskutuar çështjet globale sesa homologët e tij perëndimorë.
Duke folur në një konferencë shtypi në Moskë të mërkurën, Zakharova përgëzoi Forumin për "organizimin e tij të suksesshëm", duke vënë në dukje se ai tërhoqi shumë të ftuar të huaj.
“Kjo platformë e mirëkrijuar e dialogut ndërkombëtar në situatën aktuale globale është më e përshtatshme për detyrat e diskutimit dhe koordinimit të pozicioneve mbi çështjet aktuale të politikës së jashtme sesa ngjarje të ngjashme të mbajtura në kuadër të forumeve perëndimore si Konferenca e Sigurisë në Mynih, e cila është kthyer në një lloj tubimi antirus, rusofob, deri diku edhe racist”, tha ajo.
Zakharova iu përgjigj negativisht një pyetjeje në lidhje me pjesëmarrjen e mundshme të Rusisë në një konferencë paqeje për Ukrainën, e cila thuhet se po organizohet nga Zvicra.
"Rusia nuk ka ndërmend të marrë pjesë në një konferencë të tillë, edhe nëse është e ftuar zyrtarisht. Ky forum do t'i kushtohet promovimit të formulës ultimatum të presidentit ukrainas Volodymyr Zelenskyy, megjithëse organizatorët e saj zviceranë pretendojnë se po kërkojnë një emërues të përbashkët mes nismave të paqes të vendeve të ndryshme”, u shpreh ajo.
Ajo tha gjithashtu se Zvicrës i mungon neutraliteti dhe se "vështirë se mund të shërbejë si një platformë për përpjekje të ndryshme paqeruajtëse".
Zvicra "merr një pozicion të hapur proukrainas, voton për rezoluta antiruse, konsideron sekuestrimin e aseteve tona të ngrira, i bashkohet sanksioneve të paligjshme antiruse dhe pranon takime sipas formulës Zelensky".
Më tej, ajo thekosi se “Më në fund, në janar 2023, në strategjinë e politikës së jashtme zvicerane u përfshi se sistemi evropian i sigurisë duhet të ndërtohet jo me Rusinë, por “kundër Rusisë”. Këto veprime janë të papajtueshme me shërbimet e ndërmjetësimit”.
Diplomacia dhe politika
Forumi i Diplomacisë në Antalya është një konferencë vjetore e mbajtur nga Türkiye që nga viti 2021.
Politikanët dhe diplomatët shkëmbejnë pikëpamje mbi diplomacinë dhe politikën për të trajtuar gjëra të tilla si luftërat, terrorizmi, migrimi, ksenofobia, islamofobia, AI dhe kriza klimatike.
Rusia dhe Ukraina zhvilluan disa raunde bisedimesh për paqen në Istanbul në mars të 2022.
Që atëherë, nuk është zhvilluar më asnjë takim në kërkim të një zgjidhjeje diplomatike të konfliktit.
