ShBA-ja tha të martën se ka parë një rritje të vazhdueshme në sasinë e ndihmave humanitare që hyjnë në Rripin e Gazës, por ajo ende nuk është në nivelin që duhet të jetë.
"Ne kemi parë një rritje të konsiderueshme të numrit të kamionëve", u tha gazetarëve zëdhënësi i Departamentit të Shtetit, Matthew Miller, duke shtuar se ai është në nivelin 400.
Rreth 500 kamionë në ditë hynin në Gaza para 7 tetorit.
Por, sipas një raporti të martën nga Agjencia e Punëve të Ndihmës së OKB-së, nuk ka pasur "asnjë ndryshim domethënës" në vëllimin e furnizimeve humanitare që hyjnë në Gaza ose akses të përmirësuar në veri.
Që nga fillimi i prillit, mesatarisht 181 kamionë kanë kaluar në Gaza në ditë përmes vendkalimeve tokësore Kerem Shalom dhe Rafah, tha Miller.
I pyetur nga Anadolu në lidhje me raportin e UNRWA-s, Miller tha se shifrat e OKB-së nuk kapin gjithë vëllimin ditor, sepse nuk llogariten dërgesat komerciale pasi ato nuk janë pjesë e përpjekjeve të ndihmës.
"Ne nuk jemi ende në nivelin që duhet të jemi. Por, ne kemi parë përparim të qëndrueshëm", shtoi më tej.
"Ekspertët tanë humanitarë që janë në terren kanë parë një volum të shtuar jo vetëm në kamionë, por edhe në ndihma humanitare që hyjnë. Ne e kemi parë këtë gjatë 10 ditëve të fundit", tha Miller.
