Sekretari i përgjithshëm i Kombeve të Bashkuara (OKB), Antonio Guterres, ka shprehur mbështetjen e tij për agjencinë e OKB-së për refugjatët palestinezë (UNRWA) në mes të krizës së financimit të agjencisë, e cila u shfaq nga pretendimet se disa nga punonjësit e saj në Gaza morën pjesë në sulmin ndërkufitar të 7 tetorit ndaj Izraelit.
“UNRWA-ja është shtylla kurrizore e të gjithë përgjigjes humanitare në Gaza. Unë u bëj thirrje të gjitha vendeve anëtare që të garantojnë vazhdimësinë e punës shpëtimtare të UNRWA-së”, tha Guterres në hapjen e seancës së vitit 2024 të Komitetit për Ushtrimin e të Drejtave të Patjetërsueshme të Popullit Palestinez.
Guterres tha se OKB-ja “menjëherë” veproi pasi mori “akuzat shumë serioze” kundër anëtarëve të stafit të UNRWA-së.
“Unë personalisht u tmerrova nga këto akuza. Dje u takova me donatorët për të dëgjuar shqetësimet e tyre dhe për të përshkruar hapat që po ndërmarrim për t’i adresuar ato”, tha ai.
UNRWA-ja tha se ndërpreu kontratat me disa punonjës pas akuzave izraelite se disa nga punonjësit e saj ishin të përfshirë në sulmin e 7 tetorit.
Të paktën 12 vende, përfshirë ShBA-në, Mbretërinë e Bashkuar, Francën, Gjermaninë, Austrinë, Italinë, Australinë, Holandën, Kanadanë, Zvicrën, Finlandën dhe Japoninë, kanë pezulluar fondet për agjencinë që u formua në vitin 1949 për të ndihmuar refugjatët palestinezë në gjithë Lindjen e Mesme.
“Unë theksova rëndësinë e mbajtjes së punës jetike të UNRWA-së për të përmbushur nevojat e rënda të civilëve në Gaza dhe për të siguruar vazhdimësinë e shërbimeve për refugjatët palestinezë në Bregun Perëndimor të pushtuar, Jordani, Liban dhe Siri”, tha Guterres.
