Sllovenia nuk pajtohet me zhvendosjen e detyruar të popullit palestinez, tha ministrja e Jashtme Tanja Fajon.
Përpara një takimi të ministrave të jashtëm të Bashkimit Evropian (BE) në Bruksel, ajo foli për deklaratën e presidentit amerikan Donald Trump se palestinezët duhet të largohen nga Gaza dhe se ai do të donte ta "pastronte" gjithë enklavën palestineze.
"Ne absolutisht nuk pajtohemi me dëbimin me forcë, zhvendosjen e popullit palestinez", tha Fajon, duke kujtuar se Sllovenia njohu një Palestinë sovrane dhe të pavarur vitin e kaluar.
Ajo shtoi se palestinezët kanë të drejtë në territorin e tyre.
Fajon e përshkroi mundësinë e zhvendosjes me forcë të palestinezëve nga Gaza në Egjipt dhe Jordani, siç u propozua nga Trump, si absolutisht të papranueshme. Ajo vuri në dukje se kjo mund të përbëjë një "shkelje serioze të së drejtës ndërkombëtare humanitare".
"Unë mendoj se ne si Bashkim Evropian duhet të mbajmë një qëndrim shumë të fortë kundër kësaj", theksoi ajo.
Presidenti i ri i ShBA-së propozoi të shtunën një "pastrim" të Gazës, në të cilin Egjipti dhe Jordania do të merrnin përsipër palestinezët e zhvendosur. Ky zhvendosje, të cilën ai e propozoi në dritën e shkatërrimit të gjerë të enklavës palestineze, mund të jetë e përkohshme ose e përhershme, tha ai në një bisedë me gazetarët në aeroplanin presidencial.
Presidenti palestinez Mahmoud Abbas dhe lëvizja palestineze Hamas e hodhën poshtë propozimin e Trumpit. Kundërshtim për këtë pati edhe në Jordani dhe Egjipt.
Nga ana tjetër, ministri i Financave i ekstremit të djathtë të Izraelit, Bezalel Smotrich, ra dakord me propozimin.
