Presidenti i zgjedhur Donald Trump premtoi të enjten se do të zgjidhë një mori krizash në Lindjen e Mesme mes luftës së Izraelit në Rripin e Gazës, ngjarjeve historike në Siri dhe armëpushimit të brishtë midis Hezbollahut dhe Izraelit.
"Ndërsa flasim, gjërat po ndodhin në mënyrë shumë produktive në Lindjen e Mesme. Unë mendoj se Lindja e Mesme do të zgjidhet. Mendoj se është më e ndërlikuar se ajo ruso-ukrainase, por kjo është më e lehtë për t'u zgjidhur," tha Trump për revistën Time.
Trump nuk pranoi t'i përgjigjej një pyetjeje nëse kryeministri izraelit Benjamin Netanyahu e kishte siguruar atë se do t'i jepte fund luftës kundër Gazës së rrethuar.
"Unë mendoj se ai e di se unë dua që ajo të përfundojë. Unë dua që të gjitha të marrin fund. Unë nuk dua që njerëzit të vriten nga asnjëra anë, qoftë Rusia, Ukraina apo palestinezët dhe izraelitët dhe të gjitha, ju e dini, entitetet e ndryshme që kemi në Lindjen e Mesme”, tha Trump.
Sipas shifrave zyrtare, më shumë se 44,800 njerëz janë vrarë në Gaza që kur Izraeli filloi sulmin e tij në enklavën palestineze. OKB vlerëson se 70 për qind e të vdekurve janë gra dhe fëmijë.
Trump ka refuzuar të shtjellojë se cilat zhvillime në Lindjen e Mesme i sheh si produktive dhe nuk ka mbështetur një zgjidhje me dy shtete për t'i dhënë fund konfliktit izraelito-palestinez, duke përfshirë planin e diskutueshëm që ai paraqiti gjatë mandatit të tij të parë.
"Unë mbështes çdo zgjidhje që mund të bëjmë për të arritur paqen. Ka ide të tjera përveç dy shteteve, por unë mbështes çdo gjë që është e nevojshme për të arritur paqen e qëndrueshme", tha Trump.
