Izraeli i ka bllokuar të gjitha përpjekjet për të dërguar ndihma humanitare në Rripin verior të Gazës, tha të enjten agjencia e OKB-së për refugjatët palestinezë (UNRWA).
Në një deklaratë, UNRWA tha se u përpoq 91 herë për të ofruar ndihma humanitare shpëtimtare për Jabalia, Beit Lahia dhe Beit Sahour në Gazën veriore nga 6 tetori deri më 25 nëntor.
"82 nga këto përpjekje u refuzuan plotësisht, ndërsa 9 prej tyre u penguan," shtoi Agjencia. "Kushtet për mbijetesë po zvogëlohen për 65.000-75.000 njerëz, që vlerësohet të qëndrojnë atje," tha agjencia e OKB-së. “Për më shumë se 50 ditë, ata janë përballur me kushte në rënie për mbijetesë.”
UNRWA paralajmëroi se mijëra familje që u larguan nga zonat e rrethuara në veri të Gazës "tani po strehohen në të ftohtë dhe shi pa batanije, dyshekë dhe strehimore rezistente ndaj ujit. Situata është përtej e mjerueshme," shtoi agjencia e OKB-së.
Që nga 5 tetori, Izraeli ka nisur një operacion në shkallë të gjerë tokësore në veri të Gazës për të parandaluar rigrupimin e grupit të rezistencës palestineze Hamas.
Palestinezët, megjithatë, akuzojnë Izraelin se kërkon ta pushtojë zonën dhe t'i zhvendosë me forcë banorët e saj. Që atëherë, asnjë ndihmë humanitare, përfshirë ushqimin, ilaçet dhe karburantet, nuk është lejuar në zonë, duke e lënë shumicën e popullsisë atje – aktualisht vlerësohet në 80.000 – në prag të urisë.
Më shumë se 2.300 njerëz janë vrarë që nga nisja e fushatës shkatërruese izraelite më 5 tetor në Rripin verior të Gazës, sipas autoriteteve shëndetësore palestineze.
Sulmi ishte episodi i fundit në një luftë brutale izraelite në Rripin e Gazës që ka vrarë afro 44.300 njerëz, kryesisht gra dhe fëmijë, që nga 7 tetori 2023.
Javën e kaluar, Gjykata Ndërkombëtare Penale (GjNP) lëshoi urdhërarreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një lëndë gjenocidi në Gjykatën Ndërkombëtare të Drejtësisë për luftën e tij brutale ndaj Gazës.
