Ushtria izraelite hapi zjarr ndaj dy autoambulancave në Rripin e Gazës të dielën vonë, duke plagosur tre persona.
Incidenti ndodhi në zonën Faluja në veri të Gazës, tha në një komunikatë Gjysmëhëna e Kuqe Palestineze.
Dy punonjës shëndetësor nga Gjysmëhëna e Kuqe Palestineze dhe një person i tretë janë plagosur.
Ushtria izraelite gjithashtu bombardoi një shtëpi në Rripin e Gazës të dielën që i përkiste një familjeje jordaneze, sipas një deklarate nga Ministria e Jashtme jordaneze.
Një shtetas jordanez u vra ndërsa një tjetër u plagos rëndë në sulm, tha ministria.
Personi i plagosur është transferuar në Spitalin Baptist Al-Ahli në Gaza, shtoi ajo.
Autoritetet jordaneze njoftuan më parë evakuimin e 507 nga 741 shtetasit e tyre nga Rripi i Gazës.
Ushtria izraelite rifilloi bombardimet në Rripin e Gazës herët të premten pasi shpalli fundin e pauzës humanitare njëjavore.
Sipas ministrisë së Shëndetësisë në Gaza të paktën 509 palestinezë janë vrarë dhe 1.316 janë plagosur që nga e premtja.
Numri i të vdekurve nga sulmet izraelite në Rripin e Gazës është rritur në 15.523 që nga fillimi i konfliktit më 7 tetor, njoftoi të dielën Ministria e Shëndetësisë në enklavën e rrethuar palestineze.
