Ushtria izraelite ka vazhduar sulmet e saj në qytetin Rafah në jug të Rripit të Gazës gjatë gjithë natës, pavarësisht vendimit të Gjykatës Ndërkombëtare të Drejtësisë (GjND) dhe reagimeve ndërkombëtare.
Siç raporton agjencia palestineze e lajmeve WAFA, pavarësisht vendimit të GjND-së më 24 maj që Izraeli të ndalojë sulmet në Rafah, ushtria izraelite bombardoi rëndë vendbanimin Tel es-Sultan në perëndim të Rafahut me artileri dhe drone.
Ushtria izraelite bombardoi gjithashtu tendën e familjes Abu Jerad në Tel es-Sultan, pranë magazinës së Agjencisë së Kombeve të Bashkuara për Ndihmën dhe Punët për Refugjatët Palestinë në Lindjen e Afërt (UNRWA).
Të paktën tre palestinezë u vranë dhe shumë u plagosën në një sulm të ushtrisë izraelite në çadrën e një familjeje palestineze në një rajon ku 45 palestinezë u vranë dy ditë më parë në një sulm në një vendbanim tendash.
Në një tjetër sulm të ushtrisë izraelite në Rafah, një palestinez u vra.
Kati i fundit i spitalit indonezian në Tel es-Sultan ishte gjithashtu në shënjestër të ushtrisë izraelite.
Ushtria izraelite bombardoi shtëpinë e familjes Akl në kampin e refugjatëve Burayj në pjesën qendrore të Rripit të Gazës.
Shumë palestinezë, duke përfshirë fëmijë, u vranë dhe shumë u plagosën në sulm.
Shumë njerëz u vranë gjithashtu kur ushtria izraelite sulmoi një shtëpi tjetër në kampin e refugjatëve Burayj.
Të paktën dy palestinezë u vranë kur ushtria izraelite bombardoi shtëpinë e familjes Al-Guseyn në lagjen Ad-Derej të qytetit të Gazës.
