Numri i kamionëve me ndihma që hynë në Gaza gjatë dy ditëve të fundit nuk e ka kaluar 30-përqindëshin e vëllimit të pritur, tha të dielën Zyra e Medias në Gaza, duke përmendur kufizimet izraelite për hyrjen e furnizimeve humanitare.
Gaza mori më pak se 180 kamionë, shumë më poshtë kuotës ditore prej 600 të vendosur sipas një marrëveshjeje armëpushimi midis Izraelit dhe grupit palestinez Hamas, thuhet në njoftimin e Zyrës për Media në Gaza.
Të enjten, Ismail Al-Thawabta, kreu i zyrës së mediave, tha për Anadolu
se Izraeli vazhdon tа bllokojë ndihmën thelbësore humanitare në kundërshtim me marrëveshjen e armëpushimit.
Po ashtu dje, Hamasi tha se Egjipti dhe Katari po punonin për të zgjidhur boshllëqet në marrëveshje dhe ripohoi angazhimin e tij për zbatimin e marrëveshjes, duke përfshirë një shkëmbim të burgosurish, sipas afatit kohor të rënë dakord.
Zyrtarët palestinezë janë ankuar se Izraeli po dështon të respektojë pjesën e marrëveshjes për të lejuar më shumë ndihmë humanitare.
Hamasi kishte pezulluar lirimin e pengjeve të hënën e kaluar, duke kërkuar që Izraeli së pari të respektojë dispozitat humanitare të marrëveshjes.
Të shtunën, krahu ushtarak i Hamasit, Brigadat Al-Qassam, liroi tri pengje izraelite si pjesë e shkëmbimit të gjashtë të të burgosurve sipas fazës së parë të marrëveshjes së armëpushimit, e cila hyri në fuqi më 19 janar.
Marrëveshja është përballur me shkelje në katër fusha kyç, sipas Hamasit: vrasjet në shënjestër të palestinezëve, vonesat në kthimin e civilëve të zhvendosur në Gazën veriore, pengimin e ndihmave thelbësore duke përfshirë tendat, karburantin dhe pajisjet për të nxjerrë trupat nga rrënojat dhe kufizime në ndihmën mjekësore të nevojshme për ta rivendosur sistemin e kujdesit shëndetësor të Gazës.
Marrëveshja e armëpushimit ndaloi luftën gjenocidale të Izraelit, e cila ka vrarë rreth 48.300 palestinezë, shumica prej tyre gra dhe fëmijë, ashtu si edhe e la enklavën në gërmadha.
