Më shumë se 38.000 fëmijë palestinezë kanë mbetur jetimë nga lufta gjenocidale e Izraelit në Rripin e Gazës që nga tetori i vitit 2023, tha të enjten një zyrtar i Ministrisë së Shëndetësisë palestineze.
“Të paktën 13.901 gra janë gjithashtu të veja nga lufta,” tha Zaher al-Wahidi.
“Këto shifra pasqyrojnë shkallën e dhimbjes që ka vuajtur populli i Gazës, i cili kërkon që të gjithë të punojnë urgjentisht për t’i lehtësuar vuajtjet e jetimëve dhe familjeve të prekura dhe për ta rindërtuar jetën e tyre,” shtoi ai.
Faza e parë gjashtëjavore e marrëveshjes së armëpushimit të Gazës hyri në fuqi më 19 janar, duke pezulluar luftën gjenocidale të Izraelit që ka vrarë rreth 47.200 palestinezë, kryesisht gra e fëmijë, si dhe ka plagosur më shumë se 111.160 që nga 7 tetori 2023.
Marrëveshja trefazore e armëpushimit përfshin shkëmbimin e të burgosurve dhe qetësinë e qëndrueshme, duke synuar një armëpushim të përhershëm dhe tërheqjen e forcave izraelite nga Gaza.
Sulmi izraelit ka lënë më shumë se 11.000 njerëz të zhdukur, me shkatërrim të gjerë dhe një krizë humanitare që ka marrë jetën e shumë të moshuarve dhe fëmijëve në një nga fatkeqësitë më të këqija humanitare globale.
