Bashkimi Evropian dhe NATO-ja njoftuan sot vendimin për të formuar një grup operacional për mbrojtjen dhe qëndrueshmërinë e infrastrukturës kritike. Këtë e kumtoi presidentja e Komisionit Evropian, Ursula von der Leyen, para fillimit të takimit të Kolegjit të Komisarëve, ku ishte i ftuar të merrte pjesë edhe sekretari i përgjithshëm i NATO-s, Jens Stoltenberg.
“Në grupin operacional, ekspertët e BE-së dhe NATO-s do të punojnë së bashku për të identifikuar kërcënimet kryesore për infrastrukturën tonë kritike, për të studiuar dobësitë dhe për të zhvilluar parimet kryesore për përmirësimin e qëndrueshmërisë, por gjithashtu do të bëjnë propozime për masa dhe veprime korrigjuese”, theksoi Von der Leyen.
Ajo theksoi se grupi operacional fillimisht do të mbulojë transportin, energjinë, fushën digjitale dhe më pas grupi do t'u raportojë vendeve anëtare të BE-së dhe NATO-s.
Ndërsa Sekretari i Përgjithshëm i NATO-s, Jens Stoltenberg, tha se ky hap do të forcojë shoqëritë e vendeve anëtare.
“NATO-ja dhe BE-ja po punojnë së bashku dhe ne kemi vendosur të formojmë një Task Forcë për Rezistencën dhe Infrastrukturën Kritike. Dëshira jonë është të mendojmë së bashku se si ta bëjmë infrastrukturën dhe teknologjinë tonë kritike më rezistuese ndaj kërcënimeve të mundshme dhe të ndërmarrim veprime për të korrigjuar dobësitë e mundshme. Ky është një hap i rëndësishëm drejt forcimit të shoqërive tona”, tha Stoltenberg.
Në mbledhjen e sotme të rregullt të komisarëve të Komisionit Evropian, në prani të kreut të Aleancës, tema është mbështetja për Ukrainën dhe pasojat për sigurinë evropiane. Von der Leyen tha se do të diskutohet edhe për ndryshimet e mundshme që janë të nevojshme në politikat e BE-së dhe NATO-s për sigurinë e Evropës dhe rajonit evropian.
