Osmani-Pirc Musar takohen në Konferencën për Siguri në Mynih / Photo: Vjosa Osmani Twitter

Presidentja e Republikës së Kosovës, Vjosa Osmani, është takuar me presidenten e Republikës së Sllovenisë, Nataša Pirc Musar, në Mynih, ku aktualisht po mbahet Konferenca për Siguri.

Në takimin e parë bilateral me presidenten Pirc Musar, presidentja Osmani e ka përgëzuar për marrjen e detyrës të së pares së shtetit slloven, ndërsa ka shprehur përkushtimin e plotë për të punuar ngushtë në vazhdimin e bashkëpunimit strategjik me Slloveninë edhe gjatë mandatit të saj.

Sipas njoftimit të Presidencës, në takim u diskutua në lidhje me situatën gjeopolitike në Evropë, përfshirë luftën në Ukrainë dhe veprimet destabilizuese të Rusisë të cilat kanë tendencë edhe destabilizimin e rajonit nëpërmjet satelitit të Rusisë në Ballkanin Perëndimor.

“U diskutua edhe për zhvillimet e fundit në dialog, si dhe zhvillimet e fundit në fushën e sigurisë në Kosovë dhe rajon”, thuhet në njoftim.

Ndër të tjerash, presidentja Pirc Musar e informoi presidenten Osmani mbi prioritetet e saj presidenciale në politikën e jashtme, përfshirë vazhdimin e Samitit Bërdo-Brione.

Në takim u rikonfirmua përkushtimi për të vazhduar thellimin e marrëdhënieve miqësore dhe bashkëpunimin e ngushtë me Republikën e Kosovës.

TRT Balkan / agjencitë