Zëvendëskryeministri i parë për Integrim Evropian, Zhvillim dhe Dialog i Republikës së Kosovës Besnik Bislimi priti në takim Ambasadorin e Türkıyes në Kosovë, Sabri Tunç Angılı, njofton Zyra e Kryeministrit të Kosovës.
“Fillimisht, Ambasadori Angılı shprehu ngushëllimet e tij për familjen e të ndjerit Afrim Bunjaku, Policinë dhe popullin e Kosovës. Ai tha se Türkıye e mbështet Kosovën në këtë moment të vështirë pas këtij sulmi”, njofton ZKK-ja.
Zëvendëskryeministri Bislimi e falënderoi Ambasadorin për mbështetjen dhe mesazhin e tij. Ai e informoi atë më tej mbi sulmin terrorist të së dielës, duke thënë se ishte i orkestruar e organizuar nga Beogradi zyrtar.
Siç thekson ZKK-ja,tashmë ka prova të mjaftueshme që faktojnë përfshirjen e Serbisë në këtë sulm, nga prezenca e nënkryetarit të Listës Serbe, prezenca e truprojës së shefit të BIA-s, Vulin, e deri te mjeti i gjetur e konfiskuar në pronësi të Ministrisë së Punëve të Brendshme të Serbisë, vërtetimi i dhënë nga ushtria serbe për pajisje me armatim të rëndë e strehimi i terroristëve në Serbi.
“Ky ka qenë një skenar i përgatitur nga Beogradi zyrtar për destabilizimin e Republikës së Kosovës”, thekson ZKK-ja.
Më tej, palët diskutuan edhe për mundësitë e thellimit të marrëdhënieve të shkëlqyera bilaterale dhe rritjen e bashkëpunimit mes dy vendeve tona.
Ndryshe, në sulmin mbi Policinë e Kosovës më 24 shtator humbi jetën rreshteri Afrim Bunjaku dhe disa kolegë të tij u lënduan.
