Kryeministri i Kosovës Albin Kurti sot në Bruksel është shprehur i gatshëm të nënshkruajë marrëveshjet e Brukselit dhe Ohrit, por edhe draftin e propozuar nga pesë emisarët më 21 tetor 2023, thotë Qeveria e Kosovës.
Kurti, siç thuhet në komunikatën e Qeverisë së Kosovës, rikujtoi që ai ishte i gatshëm të nënshkruajë edhe në Bruksel më 27 shkurt 2023, edhe në Ohër më 18 mars 2023, edhe sonte, më 26 tetor 2023, duke theksuar që pikërisht Samiti i Këshillit Evropian në Bruksel është ngjarja e duhur, në vendin e duhur për nënshkrim të marrëveshjes bazike, përfshirë edhe draftin e ofruar nga BE-ja dhe ShBA-ja për zbatimin e nenit 7 në ndërlidhje të nenit 10 të Marrëveshjes Bazike.
“Marrëveshja duhet zbatuar në tërësi, pa kushte, pa vonesa”, thonë nga Qeveria e Kosovës.
Vuçiq: Serbia nuk mund të pranojë pavarësinë e Kosovës
Presidenti i Serbisë Aleksandar Vuçiq tha sot, pas një sërë takimesh me zyrtarë evropianë në Bruksel, se Serbia, në përputhje me politikën e saj, ka thënë qartë se dëshiron të zbatojë të gjitha marrëveshjet që janë nënshkruar që nga Marrëveshja Themelore e vitit 2013 e deri te marrëveshjet që u arritën më vonë në Bruksel dhe Ohër, si dhe se Serbia nuk mund ta pranojë pavarësinë e Kosovës.
“Ne gjithmonë kemi theksuar vetëm një gjë, e cila gjithmonë është përsëritur, ajo është se Serbia nuk mund ta pranojë anëtarësimin e Kosovës në OKB ose pavarësinë e Kosovës dhe në ato qëndrime kemi thënë se jemi të gatshëm të përmbushim gjithçka që është rënë dakord”, tha Vuçiq para mediave në Bruksel.
Ai tha se kemi shprehur besimin se letra që kemi marrë më 21 tetor është një bazë e mirë për të vazhduar punën në të ardhmen.
Takimi i sotëm në Bruksel u kryesura nga kancelari i Gjermanisë, Olaf Scholz, presidenti i Francës Emmanuel Macron, kryeministrja e Italisë Giorgia Meloni, presidenti i Këshillit Evropian Charles Michel, zëvendëspresidenti i Komisionit Evropian dhe Përfaqësuesin e Lartë për Politikë të Jashtme dhe të Sigurisë Josep Borrell, si dhe emisarin e tij Mirosllav Lajcak
