Drejtori i Policisë së Kosovës, Gazmend Hoxha, tha se situata e përgjithshme e sigurisë në Kosovë është e qetë, por në pjesën veriore vazhdon të mbetet e brishtë, me mundësi të tensionimit si rezultat i aktivitetit të strukturave ilegale.
Teksa përmendi sulmin e armatosur në Banjskë të Zveçanit, Hoxha shtoi se gjatë vitit të kaluar kanë menaxhuar mbi 500 protesta në veri.
Në paraqitjen e raportit të punës për vitin 2023, Hoxha para Komisionit për Çështje te Sigurisë theksoi se janë raportuar mbi 48 mijë raste pranë Policisë së Kosovës.
"Në vitin 2023 kemi pasur rritje të rasteve të vrasjeve, nga 21 në 29 raste të vrasjeve. Dhuna në familje, kemi pasur ulje gjatë këtij viti, nga 2 mijë e 757 në 2 mijë e 460. 79 për qind e rasteve të veprave penale", tha drejtori i Policisë, Hoxha.
Tutje, para anëtarëve të Komisionit për Siguri, Hoxha u shpreh se gjatë vitit të kaluar janë shënuar 96 raste të aksidenteve në trafikun rrugor me fatalitet.
Drejtori i Policisë deklaroi se në vitin 2023 janë paraqitur 1.094 kallëzime penale dhe janë goditur 23 grupe kriminale.
Kujtojmë se më 24 shtator të vitit të kaluar, një grup i armatosur serb sulmuan njësitet policore të Kosovës në fshatin Banjskë të Zveçanit në veri të Kosovës me ç’rast mbeti i vrarë një pjesëtar i Policisë së Kosovës.
