Kryeministri i Kosovës Albin Kurti ka bërë të ditur se ambasadori kosovar në Beograd Jetish Jashari ka vizituar tre policët e rrëmbyer, të cilët po mbahen peng nga Serbia.
Sipas asaj që ka shkruar Kurti në rrjete sociale në momentin e rrëmbimit, tre policët tonë kanë qenë te tryeza e improvizuar për ngrënie, duke drekuar së bashku dhe brenda juridiksionit territorial të Kosovës.
"Ata janë rrethuar nga 15 persona që i kanë sulmuar dhe i kanë rrëmbyer. Ambasadori ynë në Beograd, Jetish Jashari, sot i ka vizituar ndaras të tre policët, të cilët po mbahen peng nga Serbia. Janë tri rrëfime identike nga tre policët", ka shkruar Kurti.
Më tutje, Kurti vazhdoi duke thënë se: "Vendi ku ndodhet tryeza e ngrënies është 7 metra prej veturës së policisë. Pikërisht në atë vend ku e kemi theksuar qysh me datën 15 qershor: 1 kilometër në brendi përgjatë rrugës së bllokuar ilegale, dhe 300 metra, përkatësisht 670 metra, nga të dyja anët larg kufirit e brenda Kosovës".
Siç thotë Kurti, ata janë në të drejtën e tyre, në të drejtën e Republikës dhe këtë e dokumentojnë qartë dëshmitë që posedojnë institucionet e sigurisë, si dhe dëshmia e tre policëve kosovarë.
"Kërkojmë lirimin e menjëhershëm të tre zyrtarëve policorë. Ata duhet të lirohen pa kushte dhe të pacenuar. Njëkohësisht kërkojmë nga faktorët ndërkombëtarë, Bashkimi Evropian, Shtetet e Bashkuara të Amerikës dhe NATO-ja që ta dënojnë agresionin e Serbisë që paraqet edhe shkelje të pikës 4 të Marrëveshjes tekniko-ushtarake të Kumanovës, të 9 qershorit të vitit 1999", përfundoi Kurti.
Kujtojmë se në mesditën e 14 qershorit u ushtrua agresion i Serbisë ndaj shtetit demokratik të Kosovës, me rrëmbimin e tre zyrtarëve të Policisë sonë, thellë në brendi të territorit të Republikës.
20 Qer 2023
Kurti: Ambasadori ynë ka vizituar tre policët në Beograd
Kryeministri i Kosovës Kurti kërkoi nga faktorët ndërkombëtarë, Bashkimi Evropian, ShBA-ja dhe NATO-ja që ta dënojnë agresionin e Serbisë që paraqet edhe shkelje të pikës 4 të Marrëveshjes tekniko-ushtarake të Kumanovës, të 9 qershorit të vitit 1999.
TRT Balkan / agjencitë
Lajme të ngjashme
Artikujt në këtë kategori
Çfarë tjetër do të donit të dinit?
Popullore