Të paktën 18.342 njerëz kanë humbur jetën dhe 74.242 janë lënduar në dy tërmete të fuqishme që tronditën Türkiyen jugore të hënën, tha të premten Agjencia e vendit për fatkeqësitë (AFAD).
Tërmetet me magnitudë 7,7 dhe 7,6 ballë, me epiqendër në provincën Kahramanmaraş, prekën më shumë se 13 milionë njerëz në 10 provincat: Adana, Adiyaman, Diyarbakir, Gaziantep, Hatay, Kilis, Malatya, Osmaniye dhe Sanliurfa.
Disa vende në rajon, përfshirë Sirinë dhe Libanin, gjithashtu ndjenë lëkundje të forta që goditën Türkiyen në më pak se 10 orë.
Të paktën 121.128 punonjës të kërkim-shpëtimit janë aktualisht në terren, sipas Agjencisë së Menaxhimit të Fatkeqësive dhe të Emergjencave (AFAD).
Gjithsej 80.863 persona janë evakuuar nga rajonet e prekura nga tërmeti, thuhet në një deklaratë të AFAD-it, duke shtuar se 6.810 persona nga vendet e huaja janë dërguar në zonën e fatkeqësisë.
Ministria e Jashtme e Türkiyes tha se gjithsej 97 vende kishin ofruar ndihmë dhe se ekipet e kërkim-shpëtimit nga 61 vende aktualisht po vazhdojnë përpjekjet e tyre në terren.
Përveç ekipeve të shpëtimit, në zonat e prekura u dërguan batanije, tenda, ushqime dhe ekipe të mbështetjes psikologjike, së bashku me 12.241 automjete, përfshirë ekskavatorë, traktorë dhe buldozerë.
Gjithsej 97.973 tenda familjare u ngritën për të strehuar të mbijetuarit, njoftuan autoritetet.
Ministri i Mjedisit, i Urbanizimit dhe i Ndryshimeve Klimatike në Türkiye, Murat Kurum, tha se vendi do të nisë “mobilizimin më të madh të strehimit në fatkeqësi” në historinë e Republikës së Türkiyes në 10 provinca njëkohësisht.
Türkiye ngre një korridor ajror
Pas tërmetit të parë, Forcat e Armatosura Turke krijuan një korridor ajror për të sjellë ekipet e kërkim-shpëtimit në rajonin e prekur.
Një numër i madh avionësh transporti, duke përfshirë A-400M, transportuan ekipet e kërkim-shpëtimit dhe automjetet në rajon.
Ambulancat ajrore përdorin gjithashtu korridorin e ambulancës ajrore.
Personeli i shpëtimit dhe ndihmat janë dërguar në rajon me 150 avionë, tha AFAD-i.
Përveç kësaj, fluturimet e dy dronëve Akinci përdoren për të koordinuar punën në zonat e fatkeqësive.
Gjithsej 22 anije mbërritën në portet rajonale për dërgimin e personelit dhe materialeve dhe për evakuim.
‘Fatkeqësia e shekullit’
Presidenti turk Recep Tayyip Erdoğan tha të enjten se tërmetet në Türkiyen jugore mund të përshkruhen si “katastrofa e shekullit” dhe se vendi kishte mobilizuar të gjitha burimet e tij për t’u ndihmuar viktimave.
Për të mbikëqyrur përpjekjet e vazhdueshme të kërkimit, shpëtimit dhe ndihmës, Erdoğan ka vizituar deri më tani Kahramanmaraş, Hatay, Adana, Gaziantep, Osmaniye dhe Kilis, ku u takua me viktimat e tërmetit.
Parlamenti i Türkiyes miratoi të enjten një gjendje të jashtëzakonshme tremujore për të përshpejtuar përpjekjet e ndihmës.
Vendi po mban gjithashtu shtatë ditë zie kombëtare pas katastrofës.
Ngushëllimet kanë ardhur nga e gjithë bota duke shprehur solidaritet me Türkiyen, me shumë vende që dërgojnë ekipe shpëtimi dhe ndihmë.
