Ministri i Mbrojtjes i Türkiyes, Hulusi Akar, dhe ministri i Infrastrukturës i Ukrainës, Oleksandr Kubrakov, kanë diskutuar për marrëveshjen e drithërave të Detit të Zi, transmeton Anadolu.
Siç njoftoi Ministria e Mbrojtjes e Türkiyes, Akar dhe Kubrakov u takuan në provincën qendrore turke Kayseri dhe shkëmbyen mendime mbi hapat që duhen ndërmarrë për vazhdimin e qetë dhe të pandërprerë të marrëveshjes së drithërave, e njohur zyrtarisht si Iniciativa e Drithërave të Detit të Zi.
Marrëveshja midis Moskës dhe Kievit u ndërmjetësua korrikun e vitit të kaluar nga Türkiye dhe Kombet e Bashkuara (OKB). Ajo deri më tani ka siguruar dërgimin e 28,3 milionë tonë drithërave në vendet në nevojë përmes 903 anijeve nga tre portet ukrainase të Detit të Zi. Eksporti i drithërave u ndërpre pasi shpërtheu lufta Rusi-Ukrainë në muajin shkurt të vitit 2022.
Akar gjithashtu theksoi rëndësinë e një armëpushimi të menjëhershëm midis palëve ndërluftuese për të parandaluar humbjet e mëtejshme të jetëve dhe për të rivendosur paqen dhe stabilitetin në rajon.
Ai shtoi se Türkiye do të vazhdojë të bëjë pjesën e saj në sigurimin e paqes rajonale dhe ndihmës humanitare.
