Rreth 60.000 sirianë në Türkiye janë kthyer në vendin e tyre përtej kufirit që nga tërmetet e 6 shkurtit me qendër në rajonin jugor të Türkiyes, tha të hënën ministri turk i Mbrojtjes kombëtare, Hulusi Akar.
Duke folur në provincën Hatay të goditur nga tërmeti, ministri Akar hodhi poshtë pretendimet për kalime të paligjshme në kufirin turk, duke thënë se “është absolutisht e pavërtetë".
Duke thënë se kufijtë e Türkiyes po mbrohen, ruhen dhe monitorohen “intensivisht” në baza 24/7 me “mjete dhe pajisje të teknologjisë më të fundit”, Akar pohoi se ata po marrin masa të pagabueshme.
“Rreth 60.000 sirianë që jetojnë në Türkiye po kthehen në vendin e tyre për shkak të humbjes së shtëpive dhe të afërmve të tyre”, shtoi ai.
Më 6 shkurt, tërmete me magnitudë 7,7 dhe 7,6 goditën 11 provinca turke – Adana, Adiyaman, Diyarbakir, Elazig, Hatay, Gaziantep, Kahramanmaras, Kilis, Malatya, Osmaniye dhe Sanliurfa - të cilat morën jetën e më shumë se 50.000 njerëzve.
Më shumë se 13,5 milionë njerëz në Türkiye janë prekur nga tërmetet, si dhe shumë të tjerë në Sirinë veriore.
Sulmi ndaj Kuranit, barbarizëm i qartë
Akar dënoi gjithashtu sulmin e fundit ndaj librit të shenjtë mysliman Kuranit dhe një flamuri turk në Danimarkë.
“Sulmi ndaj flamurit dhe librit tonë të shenjtë është një shembull i qartë i barbarizmit, sjelljes së neveritshme. Ky është absolutisht krim kundër njerëzimit dhe urrejtje. Ne kurrë nuk mund ta pranojmë këtë”, tha ai.
Muajt e fundit janë parë disa akte të djegies së Kuranit, ose përpjekjeve për ta bërë këtë, nga figura ose grupe islamofobike në Evropën veriore dhe në vendet nordike.
