Drejtori turk i Komunikimeve, Fahrettin Altun, kritikoi të hënën agresionin e vazhdueshëm të Izraelit kundër palestinezëve, i cili ka çuar në vrasjen e 46 gazetarëve deri më tani.
Duke folur në një takim të organizuar nga Anadolu, në të cilin u formua zyrtarisht Aleanca e Agjencive Turke të Lajmeve (ATNA), Altun theksoi nevojën për të ndaluar sulmet e vazhdueshme të Izraelit kundër Gazës dhe dënoi vrasjen e civilëve, përfshirë gazetarët.
“Me sulmet e tij, Izraeli nuk i lë gazetarët as të jetojnë, e lëre më t'i lërë ata të zbulojnë dhe të shprehin të vërtetën,” tha ai.
Drejtori dënoi gjithashtu vrasjen e katër fëmijëve të kameramanit të Anadolu Mohamed Alaloul nga Izraeli.
“Uroj mëshirën e Allahut për fëmijët e pafajshëm të vëllait tonë Mohamed Alaloul, të cilët i humbi si rezultat të një sulmi ajror izraelit”, tha ai.
“Lutem për durimin e tij dhe shpreh ngushëllimet e mia për këtë dhimbje të papërshkrueshme”.
Altun sulmoi gjithashtu mediat perëndimore për "mbulimin" e krimeve të luftës të Izraelit.
“Kompanitë e mëdha mediatike të vendeve perëndimore kanë ndërmarrë një përpjekje të pabesueshme dhe të paturpshme për ta mbajtur këtë masakër nga vëmendja e opinionit publik botëror.
“Historia nuk do ta falë kurrë këtë hipokrizi dhe këtë të keqe, që ka plagosur dhe shkatërruar ndërgjegjen e gjithë njerëzimit”, tha ai, duke shtuar se “kur të vijë koha, ata që heshtin përballë shtypjes” do të dënohen nga komuniteti global.
"Ne, së bashku me të gjitha institucionet tona që punojnë në fushën e komunikimit dhe medias në Türkiye, i dhamë përparësi zbulimit të së vërtetës dhe arritjes së drejtësisë, veçanërisht përballë mbulimit të njëanshëm të mediave perëndimore," shtoi Altun, duke thënë se disa organizata globale mediatike sillen “sikur të ishin udhëzuar nga ushtria izraelite”.
Ai gjithashtu theksoi se kompanitë që drejtojnë organizatat globale të lajmeve janë "të lidhura pazgjidhshmërisht me kapitalin global".
Drejtori i komunikimit kritikoi përpjekjet e vazhdueshme të Izraelit për të shfaqur agresionin e tij në një dritë të mirë duke përdorur organizatat e lajmeve, dezinformimin dhe propagandën në mediat sociale.
Drejtori tha gjithashtu se Türkiye nuk kursen asnjë përpjekje për të "hequr perdet e së vërtetës".
“Kundër aktiviteteve dezinformuese të kryera nga Izraeli dhe mbështetësit proizraelitë, Türkiye po përpiqet të heqë perdet e së vërtetës me përpjekje intensive dhe të sjellë shpejt faktet në vëmendjen e gjithë opinionit publik botëror”, tha ai.
“Përpjekje të tilla, të cilat kanë për qëllim manipulimin e perceptimeve të opinionit publik botëror për të mbuluar krimet e luftës të kryera dhe për të legjitimuar gjenocidin, mund të çojnë në një krizë shumë më të thellë në rajonin tonë dhe në botë”, tha Altun.
