Altun: Lufta kundër dezinformimit gjatë fatkeqësive 'jetike'

Lufta kundër dezinformimit gjatë fatkeqësive është “jetike” pasi mund të shfrytëzojë ndjeshmërinë e njerëzve, tha të martën drejtori i komunikimeve të Türkiyes. "Shteti ynë mobilizoi të gjitha burimet e tij pas çdo fatkeqësie. Nga ana tjetër, ne kemi parë së bashku se sa jetike është të informojmë publikun në mënyrë transparente dhe të luftojmë kundër dezinformimit gjatë procesit të fatkeqësisë", tha Fahrettin Altun në një punëtori të komunikimit për fatkeqësitë, në kryeqytetin Ankara. Përveç informimit të publikut në një mënyrë "të saktë, të shpejtë, të besueshme dhe transparente", Türkiye ka kryer studime për të luftuar dezinformimin, tha ai. "Në proceset e menaxhimit të fatkeqësive, mund të ketë edhe situata ku ndjeshmëria e njerëzve për ngjarjen mund të abuzohet dhe mund të ndodhë ndotje e informacionit. Fatkeqësisht, dezinformimet sistematike dhe të organizuara, manipulimet dhe fushatat e shpifjeve mund të rriten në kohë fatkeqësie", shtoi ai. Türkiye ka qenë dëshmitare e njerëzve "të paskrupullt" që përpiqen ta kthejnë dhimbjen e njerëzve në një material politik me "iluzionet joreale" në çdo fatkeqësi, tha Altun. “Të gjithë kemi parë që institucionet dhe organizatat tona publike çdo herë përpiqen të eliminojnë pasojat e fatkeqësive, ndërsa disa u përpoqën t'i helmojnë proceset me dezinformata dhe gënjeshtra”, shtoi ai.