Kreu i Drejtorisë së Komunikimeve të Presidencës së Republikës së Türkiyes Fahrettin Altun tha se "një ditë Palestina do të jetë patjetër e lirë".
Altun ka dërguar një mesazh në rrjetet sociale me rastin e Ditës Ndërkombëtare të Solidaritetit me Popullin Palestinez.
Ai kujtoi se procesi, i cili filloi me pushtimin e kolonëve hebrenj në territoret palestineze, të pushtuara që nga viti 1947, vazhdon me masakra të dhimbshme dhe gjenocid që po vazhdon prej 420 ditësh.
"Vetëm 'aleanca e njerëzimit' mund ta ndalojë këtë gjenocid. Një ditë Palestina do të jetë patjetër e lirë", tha Altun në një mesazh të shoqëruar me një video që përmban pamjet e pushtimit të territoreve palestineze nga Izraeli dhe masakrave të kryera nga Izraeli gjatë viteve të fundit.
Në vitin 1977, Asambleja e Përgjithshme e OKB-së miratoi një vendim sipas të cilit 29 Nëntori shënohet si Dita Ndërkombëtare e Solidaritetit me Popullin Palestinez. Vendimi u mor në kujtim të rezolutës 181 të vitit 1947, e cila propozonte krijimin e dy shteteve të veçanta, një shteti arab dhe një shteti hebre të veçantë në territorin e Palestinës pas përfundimit të mandatit britanik.
Izraeli nisi një luftë gjenocidale në Rripin e Gazës pas një sulmi ndërkufitar nga grupi palestinez Hamas në tetor të vitit të kaluar, duke vrarë më shumë se 44.300 njerëz, kryesisht gra dhe fëmijë, dhe duke plagosur më shumë se 104.900.
Javën e kaluar, Gjykata Ndërkombëtare Penale (GjNP) lëshoi urdhra arresti për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli është akuzuar gjithashtu për gjenocid në Gjykatën Ndërkombëtare të Drejtësisë për veprimet e tij në Gaza.
