Presidenti turk, Recep Tayyip Erdoğan, ka dënuar ashpër sulmet ushtarake të Izraelit në Rripin e Gazës, duke i përkufizuar ato si një “masakër” të civilëve.
Në një takimi me homologun e tij palestinez, Mahmoud Abbas, presidenti Erdoğan tha se Izraeli vazhdon të “masakrojë” civilët në Gaza. Ai u shpreh se heshtja e disa vendeve evropiane dhe ndihma e tyre për Izraelin është e “papranueshme”.
Erdoğan dhe Abbas e zhvilluan takimin e tyre në Kompleksin Presidencial në Ankara për të diskutuar krizën e vazhdueshme në Palestinë, si dhe hapat e nevojshme për të arritur një armëpushim të përhershëm dhe paqe rajonale.
Erdoğan riafirmoi mbështetjen e palëkundur të Türkiyes për Palestinën.
“Türkiye do të vazhdojë të mbështesë kauzën e drejtë të Palestinës dhe do të vazhdojë të punojë për të ndaluar Izraelin dhe për të rritur presionin ndërkombëtar ndaj Izraelit”, deklaroi presidenti turk.
Ai gjithashtu dënoi dhunën e vazhdueshme të Izraelit, duke theksuar se, “Izraeli vazhdon të masakrojë civilët në Gaza, përfshirë foshnjat, si dhe të zhvendosë palestinezët e pafajshëm, të shënjestrojë shkollat, spitalet dhe zonat ku civilët kërkojnë strehim”.
Sipas tij është tepër e domosdoshme arritja e një armëpushimi të menjëhershëm në Gaza dhe sigurimin që ndihma humanitare të arrijë palestinezët pandërprerë.
“Të gjitha vendet, veçanërisht bota islame, duhet të intensifikojnë përpjekjet e tyre për të arritur një armëpushim urgjent dhe për të siguruar shpërndarjen e pandërprerë të ndihmës humanitare”, tha Erdoğan.
Më tej, ai shprehu kënaqësinë e tij për fjalimin e presidentit Abbas të planifikuar për nesër në Asamblenë e Madhe Kombëtare të Türkiyes.
“Jam i kënaqur që presidenti Abbas nesër do t’i drejtohet Asamblesë së Madhe Kombëtare të Türkiyes”, theksoi ai.
