Presidenti turk Recep Tayyip Erdoğan dënoi të mërkurën vrasjen e shefit të Byrosë Politike të Hamasit, Ismail Haniyeh në Teheran.
“Unë dënoj dhe mallkoj ashpër vrasjen e pabesë të kryer në Teheran kundër shefit të Byrosë Politike të Hamasit, Ismail Haniyeh”, tha Erdoğan në X.
Ishte "një përpjekje e neveritshme për të minuar kauzën palestineze, rezistencën e lavdishme të Gazës dhe luftën e drejtë të vëllezërve tanë palestinezë, duke synuar t'i demoralizojë, frikësojë dhe shtypë ata", shtoi ai.
Erdoğan theksoi se kjo vrasje pasqyron sulmet e mëparshme ndaj figurave palestineze si Sheikh Ahmed Yassin dhe Abdul Aziz al-Rantisi, duke pohuar se "barbaria sioniste do të dështojë edhe një herë në arritjen e qëllimeve të saj".
Ai bëri thirrje për një qëndrim të bashkuar nga bota islame për t'i dhënë fund shtypjes në Gaza dhe ripohoi angazhimin e Türkiyes për të mbështetur krijimin e një shteti sovran palestinez me Jerusalemin Lindor si kryeqytet.
Erdoğan e mbylli me një lutje për Haniyeh, duke i shprehur ngushëllimet familjes së tij dhe popullit palestinez.
Hamasi njoftoi herët të mërkurën se Haniyeh u vra në një sulm ajror izraelit në rezidencën e tij në kryeqytetin iranian Teheran.
Televizioni shtetëror iranian raportoi gjithashtu vdekjen e Haniyeh, duke vënë në dukje se një hetim për atentatin është në vazhdim dhe se rezultatet do të shpallen së shpejti.
Izraeli nuk ka bërë asnjë njoftim të menjëhershëm për vrasjen.
